Sudan: Ram pumah 'civil disobedience' campaign an ṭan

Sudan-a nawrh huai­hawttute chuan ram pum huap 'civil disobedience' cam­paign an ṭan tih sawiin, sipai rorelna chu civil sorkara leh a nih hma chuan campaign hi an kalpui dawn tih an puang.

Nawrh huaihawttu Sudanese Professionals Association (SPA) te chuan nimin aṭang khan 'civil disobedience' cam­paign hi an ṭan tih sawiin, state televison-ah civil sorkar din a ni tih sorkarna dintu ngeiten an puan hma chuan an campaign zel dawn tih an sawi.

SPA chuan thuawih lohna chu tharum thawh si loa hmalakna a ni tih an tarlang a, khawvela ralthuam ropui ber berte pawh hneh theitu a ni, an ti. Sudan-ah hian SPA kaih­hruaina hnuaiah nikum Decem­ber thla aṭang khan fuel leh eitur man san avangin nawrh huaihawt ṭan a ni a, khatih hun laia ram hruaitu President Omar al-Bashir duh lohna an lantir a ni. Mahse April 11 khan sipai chakna hmangin Transitional Military Council (TMC) te chuan President hi an paihthla a, sipai sorkar an siam zui a ni.

SPA hian civil sorkar din an duh avangin nawrh hi an la huaihawt chhunzawm zel a, kar liam ta Thawhṭanni khan nawrh huaihawtte leh sipaite inkara buaina chhuakah mi 113 lai an thih avangin buaina hi a punlun nasa hle.

African Union chuan Sudan buaina hi a nasat em avangin ramdang inrawlh lo turin an ngen. AU Chairperson Commission Moussa Faki Mahamat chuan AU hmalakna chu thlawp turin a ngen a ni.

Ningani liam ta khan AU hian Sudan chu an member nihna aṭangin a lo suspend tawh bawk a, thuchhuah an neih leh hma chuan an suspend dawn tih an lo tarlang tawh bawk.