Zote Honda Ṭhazual Lengzem-a Dinhmun sang berah Jenny Jathang

Tun ṭum Zote Honda Ṭhazual Lengzem chart-a pakhatna chu Jenny Jathang a ni a, ani hian 'Nang nen' tih hla hmangin dinhmun sang ber a luah. 

Hetih lai hian Zorinzuali Khiangte chuan a hla thar 'Ka rawn hlan' tih hla hmangin pahnihna a hauh a, HT Lalthanzami chu pathumna a ni a, top 10-ah hla pahnih a thawh ve leh a ni. 

Ṭhazual chart-ah No.1 lo kai zak zak tawh a ni a, tun ṭum­a pakhatna dinhmun a rawn luah leh ta pawh hi a mak lo. Jenny Jathang hian April thla khan kumina a music video hmasa ber 'Nang nen' tih hi a tichhuak a, thlan a hlawh hle. June thla a her chhuah meuh chuan dinhmun sang ber a luah leh ta hial a, mipuiin a zai an la ngaithla kham lo. 

'Nang nen' tih hla hi Dina Jathang phuah a ni a, ani hi hla phuah lama hriat hlawh chho mek a ni. Ṭhazual chart-a No.1 kai thei hla pawh a lo nei nual tawh a, tun ṭuma mi pawh hi ama kutchhuak ni awm renga mawi a ni. 

Music hi Rpa Ralte siam sak a ni a, recording hi Melody Recording Studio kutchhuak a ni thung. 

May thla mai khan 'Ka rawn hlan' music video a tichhuak a, tunah chuan chart-ah pahnihna hial a ni leh ta. Zorinzuali Khiangte hian tha leh zung, ngaihtuahna tam tak senga a buaipui a music video thar hi a hawhtlinpui mek a, tunlai lengzem hla lar berte zinga mi a ni. 

He hla hi Myztic Sailo phuah a ni a, music hi Lal K Sailo kutchhuak a ni thung. Video hmuhnawm tak hi Mawitea Hauchhum (RDS) kut chhuak a ni a, belhchian a dawn hle. Chart-ah nasa takin hma a sawn a, din­hmun sang ber thleng thei turin hmabak a nei eng hle. 

Chart hmasa lamah khan pakhatna a ni a, tun ṭumah erawh pathumna a ni. HT Lalthanzami hian tun ṭumah hian top 10-a lang phak hla pahnih a nei a, a ropuina sawi nep chi a ni lo. 'Hlimte'n leng ang che' tih hla hmangin top 3-ah a inhlangkai a, 'Di rialin' tih hla hmangin pariatna a hauh bawk. 

David Lalremruata pawhin a hla thar 'Nuimawite' tih hla hmangin palina dinhmun a luah a, Fakmawia Fanai chu top 5-ah a lang bawk. Josephne Lalawmpuii, Chama Thangluah, Awmtea Polymer leh Seraphic Choir-te chu top 10-ah an lang bawk.