Fast and Furious 9-ah John Cena

Hun eng emaw chen aṭang tawh a 'A inlan dawn, dawn leh lo' tih vel boruak a awm hnuah, WWE superstar John Cena chu Fast and Furious 9-ah a chang dawn tih puan chian a ni ta. 

Universal Pictures chuan John Cena inlan tur thu hi tunhnai khan an puang a, engkim a chiang tawh tih an sawi. He thu hian Fast and Furious movie ngainatute pawh a tilawm hle a, social media lamah titi a luah hneh hle. 

Hemi chungchangah hian John Cena chuan, "Kum 20 dawn hlawhtling takin an lo kalpui tawh a, an zinga ka tel ve thei tur hi chawimawina ropui tak a ni," tiin, Twitter-ah a tarlang. Kum 42 mi Cena hian - Vin Diesel, Michelle Rodriguez, Jordana Brewster, Tyrese Gibson, Ludacris leh Nathalie Emmanuel-te a zawm dawn a, WWE star Dwayne 'The Rock' Johnson erawh a inlan ve tawh dawn lo tih media-te chuan an tarlang. 

Fast and Furious 9 hi nakkum April thlaah release tura ruahman a ni a, July thla aṭang hian shooting an ṭan dawn a ni.