Kum 16 hnuah Celine Dion-i'n A mutbu a tel ve ta

Kum 16 chhunga show ṭum 1,141 zet a neihna hmun, Las Vegas ṭangin Celine Dion chu a mutbu nen a inpu chhuak ve dawn ta. 

Canadian singer ropui Celine Dion hian kum 2003 khan Las Vegas hi a pan a, June 8, Inrinni zan khan Caesars Palace-ah a show hnu­hnung ber a nei a ni. A hun hnuhnungah hian a pasal boral ta René Angélil sunna hun a hmang a, a faten stage-ah an ṭawiawm ve bawk. René Angélil hi kum 2016 khan kum 73 mi niin a boral a ni. 

'Las Vegas residency' tih hi music industry-ah chuan ṭawngkam lar tak a ni a, an sawi pawh kan hre foin a rinawm. Khawvela zaithiam lar ber berten Las Vegas-ah show nei turin contract an sign ṭhin a, an sum lakluhna hnar pawimawh ber pakhat a ni. 

Celine Dion pawh hian Caesars Enter­tainment Corpora­tion-te nen inremna siamin 2003 ṭang khan Las Vegas-ah hian show a nei ṭan a, ṭhang khat lian zet hun a hmang a ni. Artist zingah a ni aia hun hmang rei an la awm lo a, record duhawm tak nen a chhuahsan dawn a ni. 

'The Power of Love' singer hian 2007 khan Las Vegas residency aṭanga sum lalut hnem ber record a siam a, show 714 aṭangin $mtd 385.1 zet a lalut. Hun eng emawti chhung a chawlh hnuah 2011 aṭang khan show a nei ṭan leh a, show vawi 242 zet a nei leh bawk. A concert hi fan-te'n an hlut ṭhin hle a, kum 16 chhung hian show ṭum 1,141 neiin, a concert chhim­tu belhkhawm hi mi maktaduai 4.5 zet an tling a a ni. Sum pawh a lalut hnem hle ang tih a rinawm. 

'Queen of Las Vegas' 

'My Heart will Go On' singer Celine Dion hi 'Queen of Las Vegas entertainment' ti hiala sawi a ni a, hei hian a ropui zia a tarlang chiang ber awm e. Khawvela zaithiam lar leh ropui ber berte lo chettlat tawhna ṭhinah a ni aia record nei ṭha an awm lo a, a sulhnu ropui tak hi music industry-ah a dai tawh ngai lo ang.