International Women's Day pualin W10K RUN 2021 buatsaih dawn

Thawhṭanni lo awm tur Interna-tional Women's Day pual hian W10K RUN 2021 buatsaih a ni dawn.

W10K RUN 2021 hi Michelle Ralte, Lalrinngheti Sangsiama, Remi Bawihtlung, Asomi Andrew leh Department Of Women & Child Development-te insuihkhawmin an buatsaih dawn a, km 10 tlan tur niin lawmman pawh siam a ni bawk.

International Women's Day puala buatsaih mah ni se mipa leh hmeichhia thliarbik awm loin a tel theih dawn a, mipa leh hmeichhia pakhatna aṭanga pathumna-te chuan Rs 10000, Rs 5000 leh Rs 3000-te an dawng ang a, tlan tluan tlingte hnenah certificate leh finishers medal hlan an ni dawn bawk. Registration ti hman lo tan a hmunah Rs 500-in a tih theih dawn a ni.

W10K RUN 2021 buatsaihtute hian thil tum pahnih- tlan leh midang ṭanpui a ni. Registration leh donation pete chu March 8 zing dar 5:30-ah Trinity Hospital, Silaimual aṭanga Zero Point, Mualpui thlenga tlana let lehin an tlanho thei dawn. Tin, Mizoram District tina Govt scheme hnuaia Swadhar Greh home 11 din tawhahte 'domestic abuse victims' te leh hmeichhia tluk luhna nei lote awmna hmun ṭanpui an ni bawk ang.

Ṭanpuina an pek dan tur pawh hi a danglam deuh dawn a, sum leh pai pe mai loin, thiamna tak tak inpek chhawnna atan leh intundinna atana hman theih tur skills training buatsaih sak an tum a ni. Skill training-ah hian Home tinin an ṭangkai pui theihna turin “BAKING” (Chhang, cake, biscuit, etc. ur) lam zirtir an ni dawn a, an chhang ur chu Home-ina an hralh chhuah lehna tur thlengin W10K RUN 2021 buatsaihtute chuan an ngaihtuah sak dawn a ni.

"Covid-19 vangin chhungkaw tam takin harsatna nasa tak an tawk a, chung zingah chuan inchhungkhurah, abikin hmeichhe laka kut inthlakna te, intihduhdahnate leh hleilenna a thlen tam em avang hian W10K RUN 2021-in a tum ber: Ṭanrualna leh inṭanpui tawnna hian Women’s Day hmangin khawtlang hmasawnna tura thawh ho a tum a ni," tiin W10K RUN 2021 buatsaihtute chuan thuchhuah an siamah an tarlang.