Hillsong Worship-in ‘At Easter’ EP an tlangzarh

Grammy award hial pawh lo dawng tawhtu Hillsong Worship chuan kar hmasa khan hla panga awmna Extended Play (EP) thar ‘At Easter’ an tlangzarh.

An EP thara an hla dah tharte hi hla thar hlak a ni lem lo a, Hillsong classic anthem-te rawn thar thawh lehin How Can You Refuse Him Now leh King of Kings-te pawh kha an rawn dah thar leh a ni. "Hillsong Worship hi khawvel pum huap kohhran tana  Isua Krista fak leh chawimawina tur hla sa tura din a ni. At Easter hi Kalvari hla thu innghahna atana hmang hla dahkhawmna a ni a, tun Easter lo awm turah hian ringtute chuan heng hlate hi Pathian chawimawina atana an hman theihna turin leh min Tlantu thihna, a thawhlehna leh a hmangaihna ropui bik tak avanga lawmthu kan hrilh theihna tur a ni," tiin Brooke Ligertwood chuan an EP thar chungchang hi a sawi.

Kar hmasa kar tirah khan Hillsong Worship hian single 'Fresh Wind' an tichhuak bawk a, kar tawpah khan EP thar hi an tlangzarh chhunzawm leh bawk a ni. Gospel music huangchhungah chuan Hillsong Worship hian ngaihven an hlawh em em reng a, tunah hian an hlate chu vawi tluklehdingawm 3 chuang stream ni tawhin album copy maktduai 20 chuang an hralh tawh bawk.

‘At Easter’ EP hi YouTube, Spotify leh streaming platform hrang hranga ngaihthlak theihin a awm reng tawh a, Hillsong Worship rimawi ngainatute tan chuan a hmeh chhuah theih reng a ni.

1.     How Can You Refuse Him Now? (Pilgrimage)

2.     Man of Sorrows (Passion)

3.     Isaiah 53:1-6 (Profession)

4.     Agnus Dei / King of Kings (Passion, Chidima, Jenn Johnson, Brooke Ligertwood)

5.     King of Kings (Praise)