Box Office-ah Sum lalut hnem ber The Secret Life Sophie Turner channa Dark Phoenix a duai lo

Tun hnaia film chhuak thar pahnih - The Secret Life of Pets 2 leh Dark Phoenix-te chuan Box Office-ah chungnung zawk nih an inchuh a, North America bikah The Secret Life-in sum a lalut hnem zawk. Hetih lai hian Global Box Office-a sum lalut hnem zawk chu American actress Sophie Turner channa Dark Phoenix a ni! Aladdin leh Godzilla: King of the Monsters-te chu sum lalut hnem zual zingah an tel bawk. 

American film director Chris Renaud-a kut chhuak The Secret Life of Pets 2 hi May 24 khan Ireland-ah release a ni a, tun hnaia animation film chhuak thar zingah chuan thawm nei lian ber pakhat a ni. American comedian Tiffany Haddish leh Kevin Hart-te aw thawhna film hian tun weekend chhung khan North America bikah $mtd 47.1 zet a lalut a, sum thawk chhuak hnem ber a ni. Khawvel hmun dang aṭangin $mtd 16 a lalut bawk a, a sum lakluh zawng zawng hi $mtd 63.1 a ni. 

Beisei angin che ṭha tawk lo mah se North Amrica lamah chuan en hlawh ber a ni mek a, a sum lakluh pawh a la pun chhoh zel a rinawm. 

Sum lalut hnem ber ni phak lo mah se, Hollywood fan-te ngahhleh ber erawh a ni tih a chiang. 'Game of Thrones' star Sophie Turner channa a nih miau avangin dah hniam theih a ni lo a, film industry pawh a dengchhuak hneh hle. 

Dark Phoenix hi American-British screenwriter lar Simon Kinberg kutchhuak a ni a, a changtute pawh tunlai Hollywood star lar ber berte an ni. Turner bakah hian - American actress Jessica Chastain leh Jennifer Lawrence-te pawh an inlan a, sum lakluh kawngah pawh a che chhe lo. 

He sci-fi/action film hi June 4 khan tlangzarh a ni a, weekend hmasa berah $mtd 140 chuang zet a lalut a ni. North America aṭanga a lakluh hi $mtd 33 a ni a, Box Office-ah sum lalut hnem ber dawttu a ni. US pawn lamah a che ṭha lehzual a - a sum lakluh hi $mtd 107 zet a tling. A sum lakluh belhkhawm hi $mtd 140 zet a nih avangin tun weekend chhunga film mala sum thawk chhuak hnem ber a ni. 

Box Office-ah roreltu a lo ni tawh a, film hlawhtling tia chhal loh phal chi a ni lo. Aladdin hian $mtd 24.5 a lalut leh a, sum lalut hnem zual top 3-ah a lang. 

Godzilla: King of the Monsters chuan $mtd 15.5 lalutin palina a ni a, Rocketman leh Ma-ten an dawt. John Wick: Chapter 3 - Parabellum pawh sum lalut tam zual zingah a tel leh bawk a, Avengers: Endgame sum lakluh a tlahniam tak tak thei lo bawk. 

Endgame hian kar liam ta chhung khan $mtd 8.4 a thawkchhuak leh a, tihian a sum lakluh tawh zawng zawng hi $tld 2.73 zet a tling tawh a ni. Khawvela film hlawhtling ber Avatar ($tld 2.78) khum turin a dinhmun a ṭha chho zel a, an inthlauhna pawh a zim sawt hle. 

Tun hnaia film chhuak thar dang Pokémon Detective Pikachu leh Booksmart-te chu sum lalut tam zual top 10-ah an lang ve leh bawk.