September-ah Justin leh Hailey Bieber innei ṭha leh dawn?

Mipui hriata puangzar loin nikum September thla khan an lo innei tawh a, a hnuah pawh innei ṭha leh tur anga sawi an ni fo. Hetiang a nih mek lai hian Canadian singer lar Justin Bieber leh Hailey Baldwin-te chuan inkutsuih ṭhat leh an tum a, a hun atan pawh September an tinzawn tih khawthlang media-te chuan an tarlang leh ta chuai chuai mai.

US Weekly magazine chuan Justin leh Hailey Bieber-te hian an inneih champha kum khatnaah inkutsuih leh an tum a, ruahmanna pawh an siamfel tawh tih an tarlang. He hunah hi chuan an ṭhian ṭhate leh chhungkhat lainate pawh a tam zawk an tel thei tawh dawn a, ualau taka buatsaih an tum ve tawh tih an sawi. An inneihna hmun tur lam erawh tarlan a la awm lo thung. 

Justin leh Hailey Bieber-te hi kumin March thla khan an inkutsuih ṭha leh dawn tih thawm a lo awm tawh a, amaherawhchu, anmahni lam an inpeih loh avangin a hun sawn a ni. Kum 24 mi Justin Bieber leh Hailey Baldwin (22)-te hian an rilru lamah inpeih zan lohna an nei a, hei hian an ruahman angin a awm tir thei lo a ni. Tunah erawh an rilru leh taksa a inpeih chho ṭan tawh a, September velah chuan engkim tihfel vek an tum a ni.