Maxim Top 100 list Olivia Culpo a mawi ber

Khawvela magazine lar berte zinga mi Maxim chuan Top 100 List 2019 an tichhuak a, American model Olivia Culpo chu sexy berah thlan a ni. Olivia Culpo chuan a lo suangtuah ṭhin chu a takin a thleng ta tih sawiin, chawimawina ropui tak a nih thu a sawi bawk. 

Nikum khan American model Kate Upton chuan No.1 a lo hauh tawh a, kuminah erawh Olivia Culpo chhing zo an awm lo. Kate Upton hi sexy zual thlanchhuah zingah erawh hmaih chi zia zang a la ni lo a, Hailey Baldwin leh Stella Maxwell-te nen tlar hma lamah an awmho a ni. 

Kum 27 mi Olivia Culpo hi a hming pum chu Olivia Frances Culpo a ni a, a sexy a ni satliah lo - sulhnu ropui tak tak a lo hnutchhiah tawh. Miss Rhode Island USA, Miss USA leh Miss Universe title hial lo la tawh a ni a, a sexy piah lamah a thluak a ṭha tel tih a lang!

New York nula Culpo hi kum 2012 khan Miss Rhode Island USA atan thlan a ni a, hemi kum vek hian Miss USA atan thlan a ni bawk. Hemi hnu hian Miss Universe thlannaah an ram ai a awh zui a, kum 1997 hnua a vawi khat nan USA tan titlle hlu tak a hlawh chhuak zui a ni. 

Hlawhtlinna chang tur hian hun harsa tak a paltlang a, modelling lama kal chu a chhungte ngei pawhin an remtihpui lo! Culpo chuan, "Ka career-a title hmasa ber ka hlawh chhuah hnu thleng khan thlawpna ka la dawng lo a, Miss USA atan thlan ka nih hnuah erawh an 'Ok' ve ta a ni. Thla ruk hnuah Miss Universe atan thlan zui ka ni a, tun hun ka thleng hi ka lawm takzet a ni," tiin a sawi. 

Culpo chuan Miss Rhode Island atan thlan a nih lai khan a pa chuan baseball game bak a ngaihtuah loh thu a sawi bawk a, a chhungten an tipui lo chungin hlawhtling tura a beih nasat thu a sawi. 

American actress Olivia Culpo chuan a hlawhtlinna chu a lo suangtuah ṭhin leh nih a chak em em a nih thu a sawi. "Kum naupangte ka nih lai aṭang tawha ka lo dream ṭhin a ni a, a taka ka thleng ve ta mai hi mak ka ti a, chawimawina ropui tak a ni," tiin a sawi. 

Olivia Culpo hian a eizawn­na tur line a hai lo a, a tumruh leh thawhrimna chuan hlawhtlinna a chantir mek zel a ni. Maxim Hot 100 List hi kum 2000 aṭang khan tihchhuah ṭan a ni a, Taylor Swift, Miley Cyrus, Olivia Wilde, Hailey Baldwin leh Kate Upton-te chu sexy ber atana thlan zingah an lo tel tawh a ni. 

•    May 8, 1992 khan Cranston, Rhode Island-ah a piang

•    Kum 2012 khan Miss Rhode Island USA atan thlan a ni

•    Hemi kum vek hian - Miss USA leh Miss Universe title a la bawk 

•    Boston University aṭanga zir chhuak a ni

•    Nick Jonas nen 2013-2015 chhung khan an in 'date' 

•    Baseball star Tim Tebow nen sawizawm fo an ni a, finfiahna tak erawh a awm lo. 

•    American football star Danny Amendola nen kum hnih dawn an inzui

•    DJ Zedd nen kumin kumtir lam aṭang khan an inzui ve leh