India Box Office-ah Bollywood nghawr nghingtu BHARAT

A film hming aṭang ringawt pawha Bollywood ngainatute rilru dek nghal zar, 'Bharat' chuan Indian film industry a nghawr nghing mek a, a thlen chin a piang a ram a ni ber. Sum a hailut thur thur a, India Box Office a thunun hmiah bawk. 

Salman Khan leh Katrina Kaif-te channa film hi kumina Bollywood film chhuak tawh zingah chuan thawm nei lian ber a ni a, Bollywood ngainatute tuihalna pawh a phuhruk hle ang tih a rinawm. 

Bollywood 'Avengers' 

Hollywood lamah 'Avengers: Endgame' a ropui a, hemi tluk zet hian Bollywood-ah pawh Bharat-in thawm a nei lian. Indian film director Ali Abbas Zafar-a kutchhuak film hi June 5 khan tlangzarh a ni a, a sum lakluh tawh zat chu cheng vaibelchhe 175 zet a ni. Hei hi India ram bikah a ni a, release aṭanga ni riat lek chhunga a sum lakluh hi namai lo tak a ni. 

Bollywood superstar Sal­man Khan, Katrina Kaif leh Disha Patani-te channa film hian tlangzarh niah vaibelchhe 42.30 zet a lalut nghal a, kumina Bollywood film chhuak tawh zingah release nia sum lalut hnem ber a ni. Box Office-ah a chet ṭhat em avang hian 'Bollywood Avengers' ti hialin an sawi a, ni 10 lek chhungin vaibelchhe 200 a lakluh hman an ring hial. 

Kum 53 mi lai ni ve tawh Salman Khan hi Bollywood-a record nei ṭha berte zinga mi a ni a, a channa film hrang hrangte a hlawhtling ṭhin hle. 

'Bharat' hi a film chan tawh zinga vaibelchhe 100 lalut tling thei 14-na a ni tawh a, a record a theuneu lo. Bharat hi a film chan tawh zinga tlangzarh nia sum lalut hnem ber a ni a, kumina Bollywood film chhuak zinga release nia sum lalut hnem ber a ni bawk. Hei mai hi a ni lo, kumin bika Bollywood leh Hollywood film zinga sum lalut hnem pahnihna a ni a, a tluk loh awm chhun chu 'Avengers: Endgame' chiah a ni. 

Robert Downey, Jr., Chris Evans leh Chris Hemsworth-te channa film Endgame khan India rama tlangzarh a nih ṭum khan vaibelchhe 50 vel zet a lalut a, amah hnaih bertu Bharat hian vaibelchhe 42.30 a lalut a - an inhlauhna a tam lo hle.