MDM-in Silver Play Button dawng ta

Music Domain Mizoram (MDM) chuan YouTube channel-ah subscriber nuai khat chuang an neih hnuin, company lam aṭanga pawmpuina leh lawmpuina Silver Play Button an dawng ta. 

MDM hian Silver Play Button hi a thuphung chuan an lo dawng tawh a, a tak hmu tur erawh a awm mai lo. Tunah erawh YouTube CEO Wojcicki hnen aṭanga an lawmpuina dawn hian Aizawl a lo theng tawh a, MDM Office, Chanmari-ah an kawl ṭha vang tawh a ni. MDM chuan an member-te thawhrah liau liau a ni tih an hria a, lawmthu an sawi tak meuh a ni.  

MDM YouTube channel hi January 16, 2017 khan siam a ni a, kum hnih chhungin subscriber 1,66,000 chuang zet an nei tawh a ni. Viewer pawh 39,037,802 vel zet an nei mek bawk a, Silver Play Button hial an hlawh chhuak ta a ni. 

MDM hian thla tin royalty an sem ṭhin a, an library-a in register-te hnenah cheng nuai 30 chuang an sem tawh a ni. YouTube royalty pawh zaithiam eng emaw zatin an lo dawng tawh bawk.