Boss-in 200 series effect pedal tlangzarh

Boss Corporation chuan guitarist-te tana thu lawmawm an rawn chhawpchhuah sak leh ta a, Ningani khan an effect pedal 200 series ho an tlangzarh.

Boss hian an stompbox size pangai bakah 20 series an lo tichhuak tawh a, chumi hnuah footswitch pathum awm 500 series an tihchhuak leh a, a hit hle hnuah 200 series hi an tichhuak leh ta a ni. 200 series hoah hian DD-200 (Digital Delay), EQ-200 (Graphic Equaliser), MD-200 (Modulation) leh OD-200 (Hybrid Drve) an tlangzarh a, Reverb pedal an tlangzarh ve lo erawh chuan zawhna a titam hle thung.

Boss 200 series hoah hian footswitch pahnih a awm a, a pian pawh a danglam deuh a, a size erawh a tawk fu mai. DD-200 hian Boss flagship product DD-500 feature ang kha a kengtel deuh vek a, a te deuh tih mai chauh a ni - delay mode 12 an chhawpchhuak bawk. Tap tempo leh loop thlenga a theih leh tho avang hian lei a manhla hle ang.

EQ-200-ah hian EQ band 10 a awm a, graphic hmangin a screen-ah a display hian set a tinuam hle ang. MD-200 pawh hi MD-500 feature ang deuh tho a ni a, modulation mode hrang hrang 12 dah a ni a, chorus, phaser, vibrato leh a dangte a awm kim hle. 

OD-200 hian overdrive leh distortion ri hrang hrang a keng kim hle tura ngaih a ni. Guitarist tan chuan Boss-in 200 series-a drive pedal an siam tel hi thu lawmawm tak a ni ngei ang. Hetah pawh hian mode 12 tho dah a ni a, classic drive aṭanga metal distortion ri thlengin a keng kim hle tura ngaih a ni.

Boss-in pedal an tlangzarh tharte hi US dollar 249 man vel a ni tlangpui hlawm a, Mizoram lamah pawh a chah thlen theih thuai theih beisei a ni.