Femina Miss India 2019 Suman Rao

Rajasthan nula Suman Rao chu Femina Miss India 2019 atan thlan a ni a, Miss World thlannaah India ai a awh ang. Suman Rao hi Femina Miss India 2018, Anukreethy Vas chuan crown a khum tir a ni. 

Chhattisgarh aiawhtu Shivani Jadhav chu Miss Grand International-ah India aiawh tura thlan a ni a, Miss Bihar Shreya Shankar chu Miss United Continent-a India aiawhtu turin thlan a ni bawk. Hetih lai hian Telegana nula Sanjana Vij chu Runner Up a ni thung. 

Ṭhahang ngaihno bei! 

Kum 20 mi Suman Rao hi contestant zingah a tira lang­sar ber a ni hauh lo, amaherawhchu belhchian a dal hle. En mai chuan hmel ṭha ber a ni lo mai thei a, a thluak erawh a ṭha hle thung. 

Miss India, Miss Uni­verse leh Miss World pawh nise title la tur chuan hmelṭhat piah lamah thluak ṭha neih a ngai a, chu chu hmel-ṭha leh pian nalh nazawngin an nei vek lo. Suman Rao erawh a thluak a ṭha takzet. State hrang hrang aṭanga nula hmelṭha leh hleitling ber ber fuankhawm zingah 'ber' nihna a hauh a, Miss World thlannaah eng chen nge a thlen phak ang tih chu hriat chakawm tawh tak a ni. 

November 23, 1998 khan Udaipur, Rajasthan-ah a piang a, Hindu chhungkua aṭanga sei lian a ni.

Feet 5'10 zeta sang a ni a, zirna lamah pawh a duai lo hle - Mahatma Education Society, Mumbai aṭanga a graduate hnuin, Institute of Chartered Accountants of India-ah a inziak lut a, hetah hian Chartered Accountant a zir mek a ni.

A naupan lai aṭanga modelling lama tui tak a ni a, professional dancer a ni bawk. Ram chhunga fashion show lian tham hrang hrangah a lo inlan tawh a, tawnhriat a nei ṭha hle. Femina Miss Rajasthan 2019 atan thlan a ni a, Femina

Miss India thlannaah hian an state aiawhin title hlu tak a hlawh chhuak ta a ni. Suman Rao hian De­cember thlaa Miss World 2019 thlanna Thailand-a neih turah India ai a awh zui ang. Femina Miss India Grand Finale hi Sardar Vallabhbhai Patel Indoor Stadium, Mumbai-ah neih a ni a, Bollywood star Katrina Kaif, Vicky Kaushal leh Mouni Roy-te pawh an hmel hmuh tur a awm a ni. 

Mizoram innghahna Nunui Rualh­leng chu Grand Finale-ah hian a che ṭha thawkhat a, top 12 a inhlangkai. Top 6, finalist-ah erawh a tel pah ta lo a ni. Chhinga Veng nula R. Lal­nunthari (Nunui) hian Miss India thlanna neih a nih chhungin a hming a chher hle a, sub-title pawh pahnih a hlawh chhuak. Miss Fashion Icon leh Miss Congeniality atan thlan a ni. 

Nunui hian amah duhsaktute leh  lo ṭawng­taipui ṭhintute zawng zawng chungah lawmthu a sawi a, Zoram mipuiten an ṭawi­awm ṭhat avangin lawmthu a sawi bawk. Mizoram aiawha tel ten a zawnin kum thum semi-final an lut tawh a, Rody H. Vanlahriatpuii leh Lily Lalremkimi Darnei-te chuan Mizoram tan sub-title an lo hlawh chhuak tawh bawk.