Spice Girls-te'n Wembley-ah tour hmawr an bawk ta

British girl group lar Spice Girls chuan show ṭum 13 an neih hnuah, Inrinni zan khan Spice World Tour an neih chu a hmawr an bawk ta. Wembley Stadium, London-ah mipui 70,000 vel zet an pungkhawm a, ticket pawh an hralh zo vek a ni. 

Spice Girls hian Europe hmun hrang hrangah concert an nei a, an kalna lam apiangah fan singtel an pungkhawm thei zel. London khawpuiah pawh a maka maka tam fan an pungkhawm a, UK-a Stadium lian ber Wembley-ah mipui an leng lo! 

Show ṭan hmain ticket an hralh zo vek a, ticket nei lo luhruk tum tan pawh hmun a awm lo! An hla hit hrang hrang an perform a, an vanglai ang maiin an che vel pawh a la hmuhnawm. Geri-i'n thupha a chawi

Kum 46 mi Geri Horner chu re-union tour hmawr bawk zan hian a hnuk a ulh a, fan-te lakah thupha a chawi bawk. Geri chuan kum 1998-a Spice Girls a chhuahsan kha a tihsual a nih thu a sawi a, ngaihdam a dil. English singer chuan, "Ka chhuak kha ka tihsual liau liau a ni, min ngaihdam rawh u," tiin, an lar vanglai taka solo-a a kal hrang chu a tihsual a nih thu a sawi. 

Spice Girls hian Spice World Tour hi Dublin, Ireland-ah bul an ṭan a, a tirah sound system avangin sawiselna an tawk nasa hle a nih kha. Ṭha taka a tawp an khar leh tak tho avangin an hmingchhiatna hi a hliahkhuh ngeiin a rinawm. 

Spice Girls hian nakkum lamah tour an nei leh dawn a, Australia lam an pan leh dawn a ni. North America lam aṭang pawhin sawmna duhawm tak an dawng bawk.