ZOTE Honda Ṭhazual Fakna-ah Arini, Cindy leh Zorina An thiam ber

'Praise On' aṭanga Zoram mipuiin an hmelhriat, an zai­thiam em avanga tunlai gospel artist lar ber ber lo ni chho ta -  Arini, Cindy leh Zorina te chuan ZOTE Honda Ṭhazual chart-ah dinhmun sang ber an luah. 

Arini, Cindy leh Zorina te hian April thla khan 'Nunna Thar' music video an tichhuak a, he hla ngei mai hi chart-a pakhatna chu a ni. Chart hmasa lama pakhatna Mawitei Ralte chu pahnihnaah a awm ve thung a, Amtea chuan hma sawnin pathumna a ni. Stacy VL Muanpuii leh Malsawmdawngkimi-te chu top 5-ah an lang bawk. 

Praise On 2016 top 3 - R. Lalrinmawii, Cindy Lalthanpuii leh Zorinsanga Sailo te inkawp hi 'super trio' tiin sawi ila, mi tam tak chuan an 'amen' thlap ang. Amaherawhchu, zaithiam tihzawng a inang lo a, ṭawmpui lote pawh an awm ngei ang. Thil chiang ta erawh - an hla 'Nunna thar' hi tunlai fakna hla thlan hlawh ber a ni a, mipuiin an ngaithla kham thei lo. 

He hla hi Fela phuah a ni a, music track mawi tak mai hi Kima Chhangte siamsak a ni. Recording hi Masky Records a ni a, video hmuhnawm tak hi Chiangtea Videography kutchhuak a ni thung. He hla hi Mizo rilrem zawng tak a ni a, Ṭhazual chart-ah pawh hmun pawimawh a luah nghal. Zawi zawia hma sawnin, thla hnih a vei meuh chuan dinhmun sang ber hial a kai ta a ni. Arini, Zorina leh Cindy te hian an music video hi Vanlalruati hriatreng nana an siam a ni.

Ṭhazual chart-a vawi eng emaw zat pakhatna lo ni tawh Amtea chuan a hla thar 'Lunghlu' hmangin chart-ah a dinhmun a siam rem leh mek a, tun ṭumah hian pathumna a ni. He hla hi May thla-a a tichhuah kha a ni a, tunlai fakna hla thlan hlawh berte zinga mi a ni. 

Tun ṭumah hian Stacy VL Muanpuii chuan 'I rinawm ropui zia' tih hla hmangin palina a luah a, Malsawmdawngkimi leh Ocean Avenue-te'n an dawt. Lalthlengliani, Esther Khiangte, Ruthi CVL Muanpuii leh R. Lalruatsangi te chu top 10-ah an lang bawk.