Taylor Swift music video-ah milar

American singer Taylor Swift chuan a music video thar 'You Need to Calm Down' chu nimin khan official-in a tichhuak ta a, milar tak tak hmel hmuh tur an awm nawk. 

Swift hian Brendon Urie nena 'Me' an tihchhuah hnua a single hmasa ber hi kar kal ta Zirtawpni khan a tichhuak a, a tirah a lyrics video chauh hmuh tur a awm. Ni rei pawh rial loin nimin khan music video hi a tichhuak zui a, milar tak tak ten an hual vel a ni ber. 

Swift hian Pathianni khan a music video-a milar inlan an awm nual thu hi a lo sawi lang tawh a, tute nge an nih tih chu fan-te hriat chak a ni. Video chu a chhuak ta ngei a - Ellen DeGeneres, Ryan Reynolds leh Adam Lambert te hmel hmuh tur an awm. Anni bakah hian - Bobby Berk, Billy Porter, Ciara, RuPaul, Jesse Tyler Ferguson, Justin Mikita, Todrick Hall, Hayley Kiyoko, Adam Rippon, Chester Lockhart, Dexter Mayfield, Hannah Hart, Antoni Porowski, Jonathan Van Ness leh Tan France te an la awm cheu bawk. 

'Me' singer Taylor Swift hla thar hi a hit leh pek hle a, social media lamah titi a luah hneh hle a ni.