Mystical Mizoram Ṭhazual GOSPEL-ah Lalthlengliani Jongte pakhatna a ni

Mystical Mizoram Ṭhazual Gospel chart-ah Lalthlengliani Jongte 'Mifel Awmkhawm' chu pakhatna a ni.

Lalthlengliani Jongte hian nikum October thla tir lamah khan 'Mifel Awmkhawm' music video hi a tichhuak a, a tihchhuah aṭanga rei vak loah Ṭhazual Gospel chart-ah inlan nghalin chart luahlumtu ber a ni a, hma sawn zelin tunah chuan pakhatna dinhmun hial a rawn inhlangkai ta a ni. Music Video a hmuhnawm a, Lalthlengliani a zai thiam bawk nen pakhatna nih hi a phu hle.

Thlengi tan hian Ṭhazual chart topper nih hi thil thar a ni lo a, tunah 'Mifel Awmkhawm' pakhatna a rawn nihpui leh ta a, chart lehah dinhmun ṭha berah hian a hla mawi tak hi a la champui thei dawn em tih chu hriat a chakawm tawh viau mai.

Cindy Lalthanpuii'n RTC Lalduhawmi hla a cover 'Ngawlveite inhlanna' chu palina aṭangin pahnihnaah a rawn inhlangkai a, dinhmun ṭha ber lam panin ke a pen zel a, chart leh lamah hma a sawn leh a nih chuan chart topper a ni thei tawh dawn a ni.

Maruati 'Zual zelin' chu pathumna a ni a, Ruthi Zonunsangi 'Ka awm angin' chu palina niin One In Christ 'Lalpa ṭhatna' chu pangana a ni bawk.

Top 5-a inhlangkaite hi an ṭha rual hle a, chart topper la ni thei tura hmabak nei eng tak vek an ni. Chart top 10-a lang zingah Lalremruata, Hlimhlimi leh Seraphic Choir-te pawh an la tel bawk a, chart a la ngaihnawm chho zel dawn niin a lang.