MTV Movie & TV Award Best Movie 'Avengers: Endgame' Best Fight 'Captain Marvel vs Minn-Erva'

Nimin zing khan Barker Hangar, Santa Monica, Cali­fornia-ah MTV Movie & TV Award sem a ni a, rin lawk ang ngeiin Avengers: Endgame a langsar. Endgame hi Best Movie atan thlan a ni a, award dang pahnih a hui tel bawk. 

Hetihlai hian Best Fight atan Captain Marvel vs. Minn-Erva thlan a ni a, Captain Marvel-in award hlu tak a dawng. 

Avengers movie tawpna 'End­game' hi film hlawhtling tak a ni a, a dang a chhuah tawh hmel lo thung. A thar hmuh tur awm dawn tawh lo mah se a thawm erawh a reh mai dawn lo - award hrang hrang a hui mek zel a, sum a lalut thur thur bawk. 

MTV Movie & TV Award-ah pawh film mala award la hnem ber a ni a, Best Movie, Best Hero leh Best Villain-te a la. Best Movie award la tur hian - BlacKkKlansman, Spider-Man: Into the Spider-Verse leh Us-te a khum a ni. 

Robert Downey Jr. 'Iron Man' chu Best Hero atan thlan a ni a, American actor Josh Brolin 'Thanos' chuan Best Villain award a dawng bawk. 

American actress Brie Larson channa Captain Marvel chuan Avengers: Endgame a ngam lo a, kut ruak erawhin a haw bik lo. Best Fight category-ah Captain Marvel leh Minn-Erva-te in 'fight' hmuhnawm tak chuan award a la a ni. 

Hetih lai hian 'Bird Box' star Sandra Bullock chu Most Frightened Per­formance atan thlan a ni. 

Best Show category-ah chuan mitthlaah Game of Thrones (GoT) a lang ṭhin a, kuminah pawh he chawi­mawina hi a dawng leh. Drama serial lar GoT hi nikum khan Best Show atan thlan a lo ni tawh a, kum zawnin award a dawng a, namai lo tak a ni. 

Game of Thrones hi 2018 chhung khan tihchhuah a ni lo a, heti chung hian Best Show atan thlan a ni. Kumin April thla khan episode hnuhnung ber tihchhuah leh a ni a, award a dawng pawh hi a awm viau reng a ni. 

American actor Bradley Coo­per leh singer Lady Gaga-te chuan chawimawina an dawng ve leh bawk a, 'A Star Is Born' hmangin award an dawng ta nual mai. 

Lady Gaga hi Best Per­formance in Movie award hlan a ni a, Cooper nena an sak  'Shallow' chu Best Musical Moment atan thlan a ni bawk. He drama/romance film 'A Star Is Born' hian award lian tham a dawng ta nual a, Copper leh Gaga-te hlawhtlinna hmuh hmaih chi rual a ni lo. 

Award ceremony hi Ameri­can actor Zachary Levi chuan a host a, milar tel an ṭhahnem hle. Chung zingah chuan American actor Dwayne 'The Rock' Johnson pawh a tel a, Avengers: Endgame film siamtu Anthony Russo chuan thu a sawi bawk.