Megadeth frontman Mustaine a cancer

American heavy metal band Megadeth chuan chanchin lungchhiat thlak tak an nei a, an frontman Dave Mustaine chu a cancer. Hei vang hian an band-in show an neih leh turte pawh an cancel a ni.

Kum 57 mi Dave Mustaine hi a hrawk a cancer tih hriat chhuah a ni a, treatment pek nghal a ni. Hemi chungchangah hian Mustaine chuan thuchhuah siamin, "Doctor-in uluk takin treatment min pe nghal a, 90% in a hlawhtling a ni - harsatna lutuk a awm lo e," tiin a tarlang. 

"Ka bandmate-te chungah lawmthu ka sawi a, min enkawltu doctor leh ka chhungte chungah ka lawm hle bawk," tiin a sawi bawk a ni. Megadeth guitarist chanchin hian ngaihven a hlawh hle a, music khawvel a deng chhuak nghal. Fan tam takin a dam leh thuai theih nan an ṭawngtaipui thu te, an band kal leh zelna turah duhsakna an hlan thute an tarlang nasa hle. 

Mustaine hi chawl rih dawn mah se a bandmate - Kiko Loureiro, Dirk Verbeuren leh David Ellefson-te chuan studio an bel zui dawn a, engtiangin nge an kal dawn erawh an tarlang lo. Megadeth hian summer tour an neih tur chu an cancel nghal phawt a, Rock in Rio leh Megacruise Festival-ah erawh perform tur zingah an hming telh a la ni. Rock in Rio festival hi September thla khian  Rio de Janeiro, Brazil-ah neih a ni dawn a, Megacruise Festival hi October thla khian Los Angeles-ah neih tura ruahman a ni bawk. 

Dave Mustaine hian Panic band-ah music career a ṭan a, a chhuah hnuah American heavy metal band Metallica-ah an original lead guitarist a ni zui. Kum 1983 khan David Ellefson nen American rock band 'Megadeth' hi an din a, an band khaipa ber a ni a tih theih awm e. Kum 1985 khan an album hmasa ber an tichhuak a, studio album 15 zet an tichhuak hman a ni. Dave hi 1991 khan Pamela Anne Casselberry nen an innei a, fanu pahnih an nei a ni.