SEKI Inter Village Band Contest 2019 Zaninah final dawn

Rampum huap band intihsiakna SEKI Inter Village Band Contest 2019 chu zanin hian a hmawr bawk a ni dawn ta. Final hi Vanapa Hall-ah neih a ni dawn a, Open Category leh Under 19-ahte band pathum ve ve an inlan dawn a ni. 

Final lut tur zawnna hi Thawh­lehni zan khan Vanapa Hall-ah neih a ni a, Open Category-ah band panga an inlan a, Under 19-ah band pariat an inlan thung. Heta ṭang hian a tiṭha zual band pathum ve ve thlan chhuah an ni a, zaninah a thiam ber nih an inchuh leh dawn a ni. 

Open Category 

Open Category-ah hian a thiam zual pathum - Electric Veng; Lunglawn, Lunglei leh Ramhlun South I-te'n final an lut a, Mission Veng leh Ramthar Veng ten semi-final an paltlang zo lo. Thawhleni zana intihsiakah hian an che ṭha tlang hle a, endiktute tan pawh thutlukna siam harasa tur tak a ni. 

Amaherawhchu, tla an awm a ngai si a, a tawpah Electric Veng; Lunglawn, Lunglei leh Ramhlun South I-te an vannei ta a ni. An zing aṭang hian tunge thiam ber tih chu zaninah a hriat dawn a, intihsiak boruak a nung leh viau dawn a ni. 

Kum lama naupang tak tak an ni a, an che erawh a hmuhnawm loh phah chuang lo. Music lama tawn hriat nei ṭha ber berte ang bawkin stage-a an chevel a hmuhnawm a, intihsiak boruak pawh a 'hot' hle. 

Under 19-ah hian - Chanmari West, Khatla East leh Ramthar Veng-te'n pakhatna nih an inchuh dawn a, vawi khat chet sual a pawi tawh ang. An vai hian an ṭha tlang a, tu pawh hi pakhatna nise awm tak vek an ni. 

SEKI Inter Village Band Contest hmawrbawkna hi pui tham taka neih a ni dawn a, zan dar 7:00-ah ṭan a ni ang. Intihsiak bakah hian Mizorama band lar ber ber - The Scavenger Project, Origami leh Jeff &MP band te an perform dawn. 

Final zan hian result puan nghal a ni dawn lo thung a, nak­tuk zanah puan a ni ang. Result puan zan hian concert pui tham tak a awm dawn bawk. Ticket siam a ni a, sum hmuh ang angte hi miharsate ṭanpuina hman a ni ang. A hmuna kal ve thei lo tan pawh - Zonet Rimawi leh You Tube-ah live-in a en theih ang.