Box Office-ah Men in Black a hit ber

Australian actor lar Chris Hemsworth channa Men in Black: International chu Box Office-ah sum lalut hnem ber a ni a, The Secret Life of Pets 2 chuan a dawt. 

Sum lalut tam zual zingah hian - Aladdin, Rocketman leh Dark Phoenix-te chu an tel a, Avatar khum tuma tlan mek Avengers: Endgame chu top 10-ah a lang ve leh bawk. 

Fantasy/sci-fi film chhuak thar Men in Black: International hi tun hnaia Hollywood film chhuak thar zingah chuan thawm nei lian ber a ni. June 14 khan tlangzarh a ni a, tun weekend chhung khan $mtd 30 zet a lalut a ni. 

American film director F. Gary Gray kutchhuak film-ah hian Chris Hemsworth leh American actress Tessa Thompson-te an chang dun. Anni bakah hian Taipei actress Jesse Tang leh American singer Ariana Grande an la awm cheu bawk. 

Kum 35 mi Chris Hems­worth hian Hollywood industry-ah sulhnu a nei ṭha hle a, a channa film hrang hrangte chu a hlawhtling hlawm hle. Tun hnaia a channa zingah Avengers: Endgame a hit ber a, Men in Black pawh hi beisei a sang viau bawk.  

Kum 2011 khan Natalie Port­man nena an channa superhero film Thor chu tihchhuah a ni a, heta ṭang hian hma lam panin a kal zui ta zel a ni. 2103-a tihchhuah Thor: The Dark World leh Thor: Ragnarok (2017) ahte a inlan zui bawk a, Thor hi a larpui vet vet hle. 

Heng bakah hian Avengers film hrang hrangah a inlan a, Avengers: Endgame bik phei chu a hit hle. 

Khawvela film hlawhtling ber chu Avatar a ni a, a chhan pawh sum lalut hnem ber a nih vang a ni. Avatar sum lakluh tawh zawng zawng hi $tld 2.78 a ni a, mahse heti chung hian a dinhmun a him lo - Avengers: Endgame nena an inthlauhna chu $mtd 45 chauh a ni! 

April 26-a tlangzarh Aven­gers: Endgame hian thla rei lote chhungin record thar a siam dawn niin a lang a, mahse chuti maia awlsam erawh a ni hauh lo. Tun weekend chhung khan $mtd 3 vel awrh chauh a lalut a, a sum lakluh hi a tlahniam ve hret hret zel bawk. 

Chutih rual chuan Avatar khum tura a sum mamawh hi $mtd 45 chauh a nih tawh avangin record a siam a nih pawhin a mak lo ang - engtia rei nge a mamawh dawn erawh rin thiam harsa tak a ni. 

Avengers: Endgame film siamtu zinga pakhat zawk, Anthony Russo chuan sum lakluh tam lamah Avatar chu khum kher an tum lo tih a sawi chhuak mauh mai. 

American film director kum 49 mi Anthony Russo hi MTV Movie & Television Award sem ṭum khan zawhna an zawt a, "Avatar khum ringawt hi kan ngaihtuah tur a ni lo, record kan siam kher lo a nih pawhin buaina tur awmin ka hre lo," tiin a chhang. 

Canadian filmmaker ropui James Cameron-a kut chhuak Avatar hian $tld 2.78 a lalut tawh a, Russo Brothers film siam Endgame hian $tld 2.74 zet a lalut tawh bawk a - an inum boruak hi tunlai Hollywood titi pui ber pakhat a ni mek. 

1. Men in Black - $mtd 30

2. The Secret Life of Pets 2 - $mtd 24.4

3. Aladdin - $mtd 17.3

4. Rocketman - $mtd 9.4

5. Dark Phoenix - $mtd 9.3

6. Shaft - $mtd 8.9

7. Godzilla: King of the Monsters - $mtd 8.7

8. John Wick: Chapter 3 - $mtd 6.4

9. Late Night - $mtd 5.2

10. Avengers: Endgame - $mtd 3.7