Inter Village Band Contest 2019-ah Ramhlun South LC-1 an thiam ber U-19 pakhatna Chanmari West LC

State pum huap band intihsiakna SEKI Inter Village Band Contest 2019 chu nizan khan result puan a ni - Open Category-ah Ramhlun South Local Council-1-te chu pakhatna an ni a, Under 19-ah Chanmari West LC-te an thiam ber bawk. 

Final hi Ningani zan khan Vanapa Hall-ah neih a ni a, band pathum ve ve an inlan. Final zan hian result hi puan nghal a ni lo a, nizan khan puan a ni. Result puan zan hian concert pui tham tak buatsaih a ni a, lawmman hrang hrang sem nghal a ni bawk. 

Final hi boruak nung tak karah neih a ni a, entu mipui thawm pawh a ṭha hle. Vana­pa Hall khatin mipui an pungkhawm a, anmahni veng ṭan tura thawk chuak zingah hian MLA pathum lai an tel bawk. 

Open Category-ah hian - Electric Veng; Lunglawn, Lunglei leh Ramhlun South I-te an intihsiak a, a tawpah Ramhlun South I-te an ding chang ta a ni. Final-ah hian hla pahnih ṭheuh an sa a, audition round-a an lo sak tawh hla pakhat leh an duh zawng hla dang pakhat an sa tel a ni. Band hrang hrangte hi an thiam tlang hle a, chung zinga thiam ber chu Ramhlun South I-te hi an ni. 

Under-19-ah hian Chanmari West, Khatla East leh Ramthar Veng-te'n thiam ber nih tumin intihsiak an hmachhawn a, Chanmari West chhing zo an awm lo. Chanmari West LC aiawha telte hi kum lama naupang tak tak an ni hlawm a, an talent ṭhat zia an pholang chiang hle. 

Intihsiak boruak a sang a, veng leh veng inelna a nih avangin endiktute tan pawh fimkhur a ngai hle. Rimawi lama tawn hriat nei ṭha tak tak - Ramenga (Triau Traxx Drummer), Jonah Ralte (Freddy's Nighmare & Shai Hills Guitarist) leh Michael Rokhum (Drop Doubt Bassist) ten thiam an tih ber an thlang chhuak.

Thutlukna siam chung-changah hian organising committee pawh an inrawlh lo a, judge-te'n category pahniha thiam an tih ber ve ve an thlang chhuak a ni. Final zan hian guest judge pahnih - Jerome Hauzel (Dr.Luke drummer) leh Sonam Sherpa (Parikrama guitarist) te an ṭhu ve bawk. 

SEKI Inter Village Band Contest-ah hian mimal lawmman - Best Vocalist, Best Guitarist, Best Bassist, Best Drummer leh Best Keyboardist-te siam a ni a, Open Category bikah Best Musician thlan tel a ni bawk. 

Open-ah hian Lunglawn, Lunglei vocalist J.H Lalpekhlua chu Best Vocalist atan thlan a ni a, Best Guitarist chu  Eric Lalremruata, Electric Veng a ni. Best Bassist chu Gordon Lalrinmawia, Electric Veng a ni a, Best Drummer atan H. Vanlalthuama, Ramhlun South I chu thlan a ni bawk. 

Aizawl pawn aṭanga final lut awm chhun Lunglawn, Lunglei ten mimal chawimawina pahnih an la a, Nelson Chawngthu chu Best Keyboardist atan thlan a ni. Best Musician atan Vanlalṭanpuia Kawlni, Ramhlun South I thlan a ni bawk. 

Under 19-ah Remsangpuia, Chanmari West-in mimal lawm­man pahnih Best Vocalist leh Best Bassist-te an la. Best Vocalist hi Remsangpuia a ni a, Lalrinawma chu Best Bassist a ni thung. Best Guitarist atan Lalfak­awma, Khatla East thlan a ni a, Lalduhawma, Ramthar Veng chu Best Drummer niin, Manase Lalrohlua, Ramthar Veng chu Best Keyboardist atan thlan a ni bawk.