Dreamhunter An EP hmasa ber an release

Mizo band hlun leh lar berte zinga mi, Dreamhunter chuan an EP (extended play) hmasa ber chu Ningani zan khan an release ta. 

He EP-ah hian an hla record thar ‘Min nghilh lo la’, ‘Lo kir rawh’ tih leh ‘Ka lawm zel ang’ tihte an dah a, heng bakah hian ‘Dawn tisei tura’n’ tih leh live-a an perform ‘Khawvel hi’, ‘Khaw’nge i awm?’ tih leh ‘I Nun kha’ tihte an telh bawk a ni. 

A vai hian hla pasarih a ni a, an zai ngainatute tan chuan chanchin lawmawm tak a ni ngei ang. An EP thar hi tunlai khawvela streaming lar ber berah dahchhuah a ni a, khawvel hmun hrang hranga an zai ngainatute tan ngaihthlak theih turin an chhawpchhuak a ni.

Dreamhunter hian kumin hian kum 26 an tling a, an music record tharte pawh hi anmahni support tlat ṭhintu an fan-te tan an hlan a ni. An guitarist David Z Hmar chuan, "Kan music leh zaite lo hlut em em ṭhin mi tam tak an awm tih kan hria a, kan lawm hle a ni. Tuna EP hmasa ber pawh hi anmahni vang liau liaua record kan ni a, an tan kan hlan a ni," tiin a sawi. 

Dreamhunter - Muan­puia (vocals), David Z Hmar (Guitar), Rdee Ralte (Guitar) leh Jmala (Drums)-te hian an EP hmasa ber hi a lyrics video pawh tihchhuah thuai an tum a ni.