Jonas Brothers 'Runaway' a hit
Re-union an neih leh hnuah music khawvel an deng chhuak leh mek tih hai rual a ni lo - an hla thar 'Runaway' pawh nimin khan an tichhuak a, viewer maktaduai li vel zet an awm leh der tawh!
American pop rock band Jonas Brothers hian tun hmaa an lar vanglai ang kha an tawng chho leh mek a, an awm mai mai hauh lo. An music video thar 'Runaway'-ah hian - Colombian singer Sebastian Yatra, Dominican singer Natti Natasha leh Puerto Rican singer ropui Daddy Yankee-te nen an thawkho a, an music video pawh a hmuhnawm kher mai. He music video zet hi chuan fan-te pawh a tilawm hlein a rinawm a, rei tak an lo khawhar tawhna a chhawk zo ngei ang.
An hla thar chungchang hi Nick Jonas chuan sawiin, "Latin singer-te nena kan thawhhona hmasa ber a ni a, a special takzet a ni. Thank you @sebastianyatra @daddyyankee @nattinatasha for having us!" tiin a tarlang. He cross-cultural song hi a lar chho viau a nih pawhin a mak lo ang.
Video hi Venezuela film director Daniel Duran kutchhuak a ni a, an zai piah lamah an che vel a hmuhnawm tel a ni. Natasha a hmuhnawm a, Yatra a duai bik lo. 'Despacito' singer Daddy Yankee-a'n English hla a sa thiam tih a lantir a, Jonas Brothers-ten an thiam an la theihnghilh bik lo bawk.
Nick Jonas, Kevin Jonas leh Joe Jonas-te hian kuminah single pahnih - Sucker leh Cool an tichhuak tawh a, tun hnaiah khan re-union album Happiness Begins an tichhuak leh bawk. An album thar hi a hit rem rem hle a, Billboard 200 chart-ah No.1 a hauh mek a ni.