I Still Believe film behchhanin Jeremy Camp-in Walk By Faith music video siam thar

'Walk By Faith' hi Jeremy Camp studio album pahnihna, kum 2002-a a tlangzarh 'Stay' ami a ni a, khatih hunlai khan khawvela Gospel hla lar ber pawl niin Billboard Christian music chart-ah pawh No.1 a nihpui hial tawh a ni. He hla hi Camp hian a ngaina hle ni tur a ni, kum 2014-a a studio album pathumna 'Carried Me: The Worship Project' a tlangzarhah khan a dah tel leh nghe nghe.Kum 2002-a 'Walk By Faith' music video a tih chhuah kha a music video pahnihna chiah a la ni a, nimina a tlangzarh tharah hi chuan a nupui hmasa Melissa nena an biopic 'I Still Believe'-a video clip ṭhenkhat hmuh tur a awm.

He hla hi Jeremy Camp hian a ngaina viau pawh hi a awm hle a, Melissa nena honeymoon an hman laia a phuah a ni. 

'Stay' album-ah hian a nupui hlui nena an biopic 'I Still Belive' film hming put chhan ber 'I Still Believe' hla pawh a dah tel nghe nghe.

Amah Jeremy Camp pawh hian Melissa nena an biopic hi en hrehawm a tih thu a sawi hial a, an chan lai pawhin a ṭap chhuak hial tih a sawi. A chanchin film-a siam mah ni se a en chuan a thinlung a tina tih a sawi a ni.

Gospel singer hlawhtling tak Jeremy hi kum 42 lai a ni tawh a, tunah hian a nupui pahnihna Adrienne Liesching nen fa pathum nei tawhin a kohhran lawinaah 'ordained minister' a ni nghe nghe.

Jeremy leh Melissa biopic 'I Still Believe' hi film ṭha, Kristian-te tan phei chuan hmuhnawm lehzual tur tak a ni. A hla 'I Still Believe' behchhana film siam a ni bawk a, mahni ina inkhunghran laia en chi tak a ni awm e.'I Still Believe' hla hi kum 2001-a Melissa-i'n a thihsan hnua a hla phuah hmasa ber a ni a, a hmangaih hmasain a thihsan vanga rilru hrehawm tak chunga Pathian a la rin tlat thu a puanchhuahna hla a ni.

He hla thupui hmanga film siam 'I Still Believe'-ah hian Melissa Lynn Henning-Camp nena an inhriat ṭan dan, kum naupang tea an inneih dan leh hun harsa tak an paltlang dun dan te, cancer-in nupa tuak naupang tak leh inhmangaih tak a pawh ṭhen dante  tarlan a ni a, rilru a khawih hle.

Melissa thih lai hian Jeremy hi kum 23 chiah a la ni a, Melissa phei chu kum 21 chiah a la ni.

Love story thianghlim si, nula tlangval inngaizawngin Pathiana rinna an nghah nasat zia tarlanna film ni bawk, rimawi ngaina tan a karah zai ngaihthlak tur awm zeuh zeuh bawk. Hnuk no deuh tan phei chuan ṭahpui tur 'scene' pawh a awm nual.

'I Still Believe' film-ah hian Jeremy Camp-in a hun hmasa lama hmangaihna kawnga harsatna a tawh nasat zia leh tuna a nupui, Adrienne Liesching nen an intawn dan thlengin tarlan a ni. 'Walk By Faith' hla a phuah lai pawh a lang a, a nupui thi mai tur bula a sak laite pawh tih lan a ni bawk.

Riverdale star KJ Appa chu Camp lemah hian a chang a, Britt Robertson chu Melissa lemah a chang bawk. Shania Twain pawh a inlan a ni.