Box office-ah Raya and the Last Dragon Sum lak luh a tam ber

Hripui leng kara North America Box Office-a sum lalut tam ṭhin chu naupang lawm a ni deuh zel dawn niin a lang. Kan boruak tawn mek kara  The Croods: A New Age hlawhtlin zia kan tarlang fo tawh a, chart hmasa lamah Tom and Jerry-in ro an rel ren rawn a, tunah chuan Disney film Raya and the Last Dragon-in North America Box office-ah ro a rel leh tawh.

US-a khawpui lian tak tak- Chicago, San Francisco, leh New York City-ahte theatre hawn a ni leh ṭan tawh a, chuti chung chuan sum lengvak a la tam lutuk hleithei lo a, North America Box Office-in ngai a awh leh theihna tur chuan hun a la duh rei dawn a ni mah na. Chutiang boruak karah chuan kar tawp liam taah khan Raya and the Last Dragon hi tlangzarh niin theatre  2,045 aṭangin $8,502,498 a lalut a, Tom and Jerry dinhmun ṭha sa a rawn nek chhuak ta a ni.

Disney Plus streaming platform-ah pawh Raya and the Last Dragon hi en theihin chhawp chhuah a ni reng a, chuti chung chuan theatre-a kala entu an tam hle tho tih a hriat a, a sum lakluh hi tam lutuk angin lang lo mah se streaming platform-a pek chhuah a ni reng chunga hetiang zat sum a lalut thei hian America mipui lawmzawng film a nihzia a tilang chiang awm e.

Ram dang box office aṭanga a sum lakluh nen chuan $maktaduai 26.1 a lalut tling nghal a, heti chung hian an budget $mtd 100 hmu chhuak tur erawh chuan hun a la duh rei deuh mai thei a ni.

Kar hmasa lama pakhatna Tom and Jerry chu pahnihna niin $6,600,000 a lalut tling a ni.

Pathumna chu Chaos Walking a ni. He film hi a dangdai hle a, khawvel pakhat, hmeichhia awm miah lohna, chu khawvela chengte'n an rilru an inhriat theih veknaa hmeichhe pakhat a va kalna film a ni a, theatre 1,980 aṭangin $3,775,350 a lalut.

Kar tawp Box Office-ah khan film thar tlem azawng a awm. Raya and the Last Dragon leh Chaos Walking bakah hian palina Boggie-te, 19-na My Salinger Year leh 24-na No Place-te chu film thar a ni bawk.