HBO Max-ah Zack Snyder's Justice League an dah palh!

Karleh Ningania tlangzarh tur, khawvelin a nghahhlelh Zack Snyder's Justice League chu Thawhṭanni khan an tlangzarhna tur streaming platform HBO Max-ah an dah palh.

Justice League director's cut hi Thawhṭanni khan 'Tom and Jerry' en tum ṭhenkhat chuan an tum loh zawk an hmet chhuak a, mi ṭhenkhat phei chuan twitter-ah a post hman hial!

WarnerMedia lam pawhin thuchhuah an siam nghal vat a, "Zack Snyder’s Justice League’ chu HBO Max-ah rei lo te en theihin a awm hman a, mahse minute rei lote hnuah thil kalsual a awm a ni tih hriat chhuah a ni nghal," tiin an tarlang. Mahse DC film ropui hi darkar khat vel lai chu en theihin a awm hman niin report ṭhenkhat chuan an tarlang.

Fan-te erawh an lawm lo hle a, Justice League 2017 chungchanga lungawi lo rual fan-te chuan social media-ah Warner Bros. lam an bei nghal a, an dahsual luiah an ngai a ni. Zack Snyder's Justice League hian ngaihven a hlawh hle a, Warner Bros. lam hian a hlawhtlin viau an hlau niin mi ṭhenkhat chuan an ngai.

Zack Snyder's Justice League aṭanga hlawkna zawng zawng hi American Foundation for Suicide Prevention (AFSP) chuan an tel vek dawn a ni. Film en hmantu zinga mi Dough Bass chuan twitter-ah DC fan a nih loh thu a sawi a, chutih rual chuan a film en hman chin chu DC Film siam tawh zawng zawngah a la hmuhnawm ber tih a sawi thung.

Mahse twitter lama Zack Snyder's Justice League thlalak post-te chu a hnu lawkah hmuh theih lohin a awm zui vek a ni.