Pantera reunion beiseitu Dimebag Darrell

Pantera videographer leh Dimebag Darrell ṭhian hnai tak ni bawk Daryl 'Bobby Tongs' chuan Dimebag khan a thih hma lawk khan Pantera inzawmkhawm leh a beisei tih  Landry.audio podcast-ah a sawi.

November 2004 khan Dimebag chu a inah va tlawhin, chu chu a dam laia a hmuh tawp ber  anih thu a sawi. "Tuna kan buaipui mek (Damageplan) tour hi December-ah kan zo ang a, chumi zawhah Krismas leh thildangah pawh ka hmu leh ang che. Chumi zawhah chuan tuna kan buaipui ni lo, thildang kan buaipui ang. Engpawh ngai dawn se, kan inko khawm leh ang," tiin min lo hrilh a ni, a ti.

"A theihna zawng zawng chhuah a tum a, an kalpui mek (Damageplan) kha a hne tawh hle a, Pantera-a kir leh kha a chak a ni," tiin a sawi.

Vanduaithlak takin Darrell Lance Abbott (a hming tak) hi Krismas chawlh hmanga haw tur a awm ta lo a, December 8, 2004 khan a unaupa Vinnie Paul nena an band din Damageplan-in Alrosa Villa club, Columbus-a concert an nei lai chu stage-a a guitar perh lai a fan pakhat chuan a kap hlum a ni.

A duhthusam chu a thleng thei ta lo a, Pantera chu an inzawmkhawm leh ta ngai lo bawk. Kum 18 a liam hnu, June 2018 khan a unaupa, Pantera drummer ni bawk Vinnie Paul chu a thi ve leh a, khawvelin Pantera original line up chu engtikah mah a hmu leh tawh ngai dawn lo.

" Tuna kan buaipui mek (Damageplan) tour hi December-ah kan zo ang a, chumi zawhah Krismas leh thildangah pawh ka hmu leh ang che. Chumi zawhah chuan tuna kan buaipui ni lo thildang kan buaipui ang. Engpawh ngai dawn se, kan inko khawm leh ang"

- Dimebag Darrell

•    Rolling Stones-in 2011-a "The 100 Greatest Guitarists of All Time" a tihchhuahah khan Dimebag hi 92-naah a awm.

•    Louder 2018 'The 50 Greatest Guitarists of All Time'-ah 19-na a ni.

•    Gibson-in 2015-a 'The Top 10 Metal Guitarists of All Time' a thlanah khan pangana a ni bawk.

•    VH1-in kum 25 chhunga 'most influential metal guitarist'-ah a thlang.

•    Guitar contest-a a telnaah a champion nasa lutuka, midang an champion ve theihna turin competition-ah tel loa judge tura sawm hial zawk a nih thu a chanchin ziahna pakhatah chuan a inziak!

Thrash metal band ṭha sawi apianga an hming lamrika awm ziah Pantera hi kum 1981 khan Dimebag-te unau bakah Rex Brown leh Terry Glaze-te'n an din a, kum 1986 khan Glaze hi Phil Anselmo chuan a thlak a ni. Glaze ho hian album pathum an tichhuak hman. Cowboys from Hell album kha Mizo-te pawhin kan hriat lar ber a ni awm e, an hla 'Cemetery Gates' phei chu khawvela metal hla chuai tawh ngai lo tur a ni ngei ang.

Album pakua tlangzarh hmanin kum 2003 khan an keh darh a ni.