Elton John hnenah France civil mite chawimawina sang ber hlan a ni
British singer ropui Sir Elton John chu France civil mite chawimawina sang ber 'Legion d'Honneur' hlan a ni.
Rimawi lama a thawh hlawk em avanga 'Sir' nihna hial an pek, Elton John hi Inrinni khan France presidential palace-ah chawimawina hi hlan a ni. France president Emmanuel Macron chuan Legion d'Honneur hi a hlan.
Kum 72 mi Elton John hi President Office chuan 'melodic genius' tiin a sawi a, British ni mah se France mite chawimawina sang ber hlan hi a phu tih a tarlang.
Chawimawina hlan a nih ṭum hian a hming chawia a din 'The Elton John Aids Foundation' hmalakna hrang hrang a sawi a, HIV venna kawnga hmalakna leh, zirna leh ṭanpui ngaite ṭanpui nan £mtd 310 zet an thawkchhuak tawh tih a sawi. Elton John chuan AIDS dona kawngah nasa zawka hmalak a pawimawh tih sawiin, "Rimawi ka ngainat tluk zeta ka ngaihpawihmawh a ni" tiin a sawi.
'Rocket Man' singer Elton John chuan France ramin civil mite hnena chawimawina sang ber a hlan ṭhin 'Legion d'Honneur' hlan a ni ve ta mai chu lawmawm a tih thu a sawi a, a mimal tak pawhin France nen chuan inzawmna thuk tak an nei tih a sawi. "He hmun (France) ah hian chenna-in ka nei a, lo kal hi engtik lai pawhin ka chak ṭhin. French culture hi ka ngaina a, a mihring chengte pawh ka ngaina tak zet a ni," tiin lawmthu sawina a nei.
Elton John-a chanchin tarlanna Rocketman biopic chu May thla khan tlangzarh a ni a, chawimawinain a umzui leh ta a ni. Pop legend hian nikum khan a tour tawpna ni tawh tur 'Farewell Yellow Brick Road' chu a ṭan a, nakkum December thla thleng a awh dawn a ni. Hemi chhung hian concert ṭum 300 chuang a nei dawn a, khawmualpui panga a thlawh dawn a ni.