Parineeti coach tur Manav Kaul

Indian badminton player chhuanvawr Saina Nehwal chanchin tarlanna film chu shooting ṭan a ni dawn hnai a, Saina lema chang tur Parineeti pawh a inbuatsaih ngawrh sawt hle. He film-a chang tur hian Manav Kaul chu biakfel a ni leh ta a, Parineeti coach-ah a ṭang dawn. 

Indian theatre director Manav Kaul inlan tur thu hi tunhnai khan puan a ni a, Parineeti nena an inkawp tur hi hmuh chakawm tawh tak a ni. Kum 30 mi Parineeti Chopra pawh a phur tawh hle a, gym a kal tluk tluk a, badminton a practice ngawrh hle bawk. 

Parineeti chuan, "Zingah hma takah thoin badminton ka khel ṭhin a, Saina thiamna ang pawchhuak thei turin theihtawp ka chhuah a ni. Physio team ṭha takin min enkawl a, world class player-te nen training kan nei ho ṭhin a ni," tiin, a lo sawi tawh. A thlalak hrang hrang pawh Instagram lamah hmuh tur a tam hle a, a taksa pawh a fit ṭhat tawh hmel viau bawk. Saina Nehwal biopic hi Amol Gupte chuan a direct dawn a, a chhuah huntur erawh tarlan  a la ni lo.