ZOTE HONDA Ṭhazual Lengzem-ah Zorinzuali 'Ka rawn hlan' a mawi ber

Zorinzuali Khiangte chuan a hla thar 'Ka rawn hlan' tih hla hmangin Zote Honda Ṭhazual Lengzem chart-ah dinhmun sang ber a luah a, chart hmasa lamah khan pahnihna a ni. 

Hetihlai hian chart hmasa lama pakhatna Jenny Jathang chu pahnihna a ni ve thung a, Josephine Lalawmpuii chu a hla thar 'Khep khep mai a' tih hla hmangin top 3-ah a inhlangkai bawk. 

Tunlai Lengzem singer lar Zorinzuali Khaingte hi Ṭhazual chart siam a nih tirh aṭanga hming langsar a ni a, tun thlengin a hming a la dai lo. A hla zawng zawng hi chart-ah No.1 an kai deuh vek avangin, a hlawhtling tih loh phal chi rual a ni lo. 

Zorinzuali hian 'Ka rawn hlan' tih hla hi May thla khan a tichhuak a, a hlawhtlinpui hle. Tunah hian Lengzem hla thlan hlawh ber a ni mek , mipuiin a zai an ngaithla kham thei lo. He hla hi Myztic Sailo phuah a ni a, a music hi Lal K Sailo kutchhuak a ni. Music video hi Mawitea Hauchhum kutchhuak a ni ve leh bawk a, zoram entertainment khaw­vela hming hriat hlawh tak takte kutchhuak a nih avangin dinhmun sang  ber a luah pawh hi a mak lo. 

Chart hmasa lama pakhatna dinhmun luahtu, Dina Jathang hla phuah 'Nang nen' tih thiam tak maia satu Jenny Jathang erawh pahnihnaah a awm ve ta a, Zorinzuali a ngam ta lo a ni. Jenny hi Ṭhazual chart-ah a mikhual lo hle a, chart-ah hian hun eng emaw chen chu dinhmun ṭha tak a la luah chhunzawm ngei a rinawm.

Pathumnaah hian kar hmasa lama pangana, Josephine Lal­awmpuii 'Khep khep maia' chu a rawn inhlang kai dawrh thung a, Josephine-i tan chuan chanchin lawmawm tak a ni ngei ang. A dinhmun a sawh nghet zel tih loh rual a ni lo a, chart-ah kan hmu zel a nih pawhin thil mak a ni lo ang.

Chart hmasa-a palina David Lalremruata 'Nuimawite' chuan a dinhmun ngai a luah a, panganaah erawh chart hmasa lama pathumna luahtu. HT Lalthanzami 'Hlimte'n Leng ang che' tih a awm thung. Chama Thangluah hla 'Khawi­ah nge i ṭuan le' chu pa­ruk­­na­ah a awm a, pasarihnaah hian HT Lalthanzami hla tho 'Di rialin' tih chu a awm bawk a ni. Pariatnaah hian hmel thar kan hmu a, Priscilla Fanai hla 'Ka duh leh duh loh' tih chuan chart-ah a hmel a rawn lan ṭan bawk. 

Seraphic Choir chuan pakua­na dinhmuna luahin, Fakmawia Fanai 'I hmangaih ber' tih chu top 10-ah a lang bawk a ni.