BET Award sem a ni ta Album of the Year dawngtu Cardi B

African American leh American minority-te hnena kumtina sem ṭhin BET Award chu nimin zing khan Microsoft Theater, Los Angeles-ah sem a ni a, music, acting, sport leh entertainment huanga mi hlawhtlingte hnenah chawimawina hlan a ni. 

Music huangah chuan American hmeichhe rapper lar Cardi B a langsar ber a, Album of the Year award hlan a ni. Movie lamah BlacKkKlansman chu Best Movie atan thlan a ni a, infiamna lamah Serena Williams leh Stephen Curry-te'n chawimawina an dawng bawk. 

'Money' rapper Cardi B hian chawi­mawina dawn theih zawng zawng deuh thaw a lo dawng tawh a, a la dawn belh mek zel bawk. BET Award-ah pawh ropui takin a inlan a, award hlu tak a humhaw leh bawk. Kum 26 mi Cardi B hian award ngaihhlut ber pakhat Album Of The Year chu 'Invasion of Privacy' hmangin a dawng a, a ropui zia hmuh hmaih rual a ni lo. He a debut album hi nikum April thla khan a tichhuak a, a hlawhtlinpui rem rem hle. A studio album pakhatna chauh ni mah se award a hlawh chhuak hnem tawh hle. 

Cardi B hi Female Rapper Of The Year atan thlan a ni a, award ceremony-ah hian a perform bawk. Music huangah hian Childish Gambino, Bruno Mars leh Migos-te an langsar viau bawk. Childish Gambino hi Video of The Year award hlan a ni a, Bruno Mars chu Best Male R&B/Pop Artist award hlan ni a, American Hip hop group Migos-te chu Best Group award hlan an ni bawk. Nipsey Hussle chu Best Male Hip-hop Artist atan thlan a ni a, Best New Artist chu Lil Baby a ni. 

American actress Regina King leh Michael B. Jordan-ten award ngaihhlut an dawng a, Best Actor leh Actress atan thlan an ni. 'Seven Seconds' star Regina King hian chawimawina dawn a phu a, Michael B. Jordan ropuina a la chuai bik lo bawk. 

American actor John David Washington leh Laura Harrier-te channa BlacKkKlansman chu Best Movie atan thlan a ni a, award a dawng hi a mak lo. Young Atars Award chawimawina chu Marsai Martin kutah hlan a ni bawk. 

Infiam mi zingah Stephen Curry leh Sere­na Williams-te chhing zo an awm lo - mi bik an nih zia an pholang nawn leh ta. American tennis star Serena Williams hi Sportswoman of The Year atan thlan a ni a, basketball club Golden State Warriors innghahna Stephen Curry chuan Sportsman of The Year award a dawng a ni. 

BET Award 2019-ah hian record thar 13 zet siam a ni. Bruno Mars chuan Best Male R&B/Pop Artist award a dawng a, a zawna kum thum award la thei hmasa ber a ni. Chris Brown leh Usher-te chuan ṭum thum ve ve an lo dawng tawh bawk a, kum zawnin an dawng lo thung. Migos-te chu a zawna Best Group atan thlan hmasak ber an ni bawk.