Box Office-ah Men In Black rorelna a tawp Ropui takin Toy Story a inlar

Box Office-ah roreltu an inthlak a, Men In Black Interna­tional chuan a lal ṭhutheng a hum zo lo a - hetih lai hian Toy Story 4 chu ropui takin a inlar. 

Fantasy/adventure film chhuak thar Toy Story hian $mtd 118 zet a lalut a, tuma tluk rual a ni lo. Amah hnaih bertu Child’s Play chuan $mtd 14.1 a lalut a, an sum lakluh hi a inthlau veng veng hle. 

Toy Story thar chu 

Animation film 'Toy Story' hi  alo chhuak nual tawh a, en hlawh tak tak vek an ni. A chhuak thar ber Toy Story 4 pawh a che ṭha leh pek hle a, rin phak bakin sum a hailut hnem. 

American animator Josh Cooley kutchhuak film hi June 21 khan tlangzarh a ni a, khawvel hmun hrang hrangah hralh a tla hle. North America leh Europe aṭanga a sum lakluh hi $mtd 238 zet a ni a, namai lo tak a ni. Khawvel hmun hrang hrang aṭanga a sum lakluh belhkhawm hi $mtd 395 zet a tling tawh a, Global Box Office-ah record a siam hial. 

American actor Tim Allen leh Tom Hanks-te aw thawhna film hi mihring tamna China lamah pawh hralh a kal hle a, tun hnai film chhuak tharah chuan thawm nei lian ber a ni mek. Kum 2010 khan Toy Story 3 tihchhuah a ni a, kum 10 dawn a liam hnuah a thar tihchhuah leh chauh a ni. Mipuiin hun rei tak an lo nghah tawh hi an hmaih phal lo a, tun weekend chhung ringawt pawh khan theater 4,575 zetah chhuah a ni. 

Tun hnai film chhuak thar dang Child’s Play chu sum lalut tam pahnihna a ni a, $mtd 14.1 a lalut. He thriller/slasher film hi June 19 khan tihchuah a ni a, Toy Story 4 nen an innan chin avangin beisei angin Box Office-ah a che ṭha tawk lo. 

Child’s Play hi Aladdin chuan a dawt a, an sum lakluh pawh a inthlau lo hle. Sum lalut hnem ber dinhmun hial lo hauh tawh Aladdin hian $mtd 12.2 a lalut ve leh a, Box Office aṭanga a sum lakluh tawh zawng zawng hi $742.3 zet a tling tawh a ni. 

Kar hmasa khan sum lalut hnem ber dinhmun a luah a, tun ṭumah erawh palina a ni. A sum lakluh zat hi $mtd 10.8 a ni a, a tlahniam nasa hle. 

Australian actor Chris Hem­sworth leh Tessa Thompson-te channa Men In Black International hi a sum lakluh a tlak hniam chak em avangin beisei a phak lo tih loh rual a ni lo. Tun ṭumah hian - Secret Life of Pets 2, Rocketman leh John Wick: Chapter 3-te chu sum lalut tam zingah an tel a, Godzilla: King of the Monsters, Dark Phoenix leh Shaft-te chu top 10-ah an lang bawk.