Joe Jonas & Sophie Turner June 29-ah inkutsuih ṭha leh dawn

Kumin May thla khan puanzar lawk awm loin an lo innei tawh a, amaherawchu, an la duh tawk mai lo. Tun thla ni 29 hian France-ah Joe Jonas leh Sophie Turner-te chu an an inkutsuih ṭha leh dawn tih khawthlang media-te chuan an tarlang mauh mai. 

American singer Joe Jonas leh Game of Thrones star Sophie Turner-te hian tunhnai khan an inneihna hmun tura sawi France hi an pan a, Nick Jonas leh Priyanka Chopra-te pawh Paris khawpuiah an hmel hmuh tur a awm. Hei hian Joe leh Turner-te inneih ṭhat tur hi a nemnghet a ni, an ti a, anmahni lam chuan thuchhuah an la nei lo thung. 

Kum 23 mi Sophie Turner hian tunhnai khan Instagram lamah Paris-a an thlalak hrang hrang a post a, comment-na lamah Dr. Phil chuan an inneih hun tur hi a sawi lang zauh a ni. TV host Dr Phil chuan, "Wedding ceremony atan kar khat chiah a awm ta," tiin a comment a, heta ṭang hian an inneih hun tur hi an chhut a, June 29 an ngaihruat ta a ni. 

Joe Jonas leh Sophie Turner-te hi May thla khan Billboard Music Award sem hma lawkin Las Vegas-ah an innei a, award semna hmunah hian an hmel hmuh tur a awm zui bawk. An inkutsuihnaah hian an chhungte leh ṭhian hnai zualte bak an tel lo a, a aia ropui zawkin France-ah inneih ceremony an buatsaih leh dawn tih tarlan a lo ni tawh bawk. Hei hi a thleng dik ngei dawn a nih hmel hle.