Tiger Shroff leh Disha Patani an inṭhen

Bollywood star Tiger Shroff leh Disha Patani-te chu an inṭhen tih media-te chuan an tarlang. 

Kum 29 mi Shroff leh Disha (27)-te hi tun hnaiah an inkar a ṭha lo hle tih an sawi a, a tawpah chuan ṭhenna biahthu an inhlan ta nge nge a ni. Hetih rual hian June 13 kha Disha piancham a ni a, Shroff hian a piancham pual hian an lam dunna video ṭhenkhat pawh social media lamah a post a, en a hlawh hle. Hei hian an inkar khi a siam ṭha leh mai dawn emaw an ti hman a, amaherawhchu, an beisei lo thil a thleng ta zawk a ni. 

Disha leh Shroff-te hi nikuma tihchhuah Bollywood film lar tak 'Baaghi 2'-ah khan an changdun a, an inngaina viau tih pawh hairual a ni lo. Kum 2016 aṭang khan an inzui ṭan tawh a, amaherawhchu, an inkar thu hi an sawi chhuak ṭha duh ngai meuh lo a ni. 

Disha hi tunlai Bollywood star zingah chuan thawm lian ber pawl a ni a, tun hnaia tih chhuah 'Bharat'-ah pawh khan Salman Khan leh Katrina Kaif-te nen an changho a ni. Tunah hian 'Malang' filmah Anil Kapoor nen an changdun leh mek a, shooting an neihna lamah a inhliam avangin a chawl lai lawk a, chanchin duh­awm loh lam a nei zui ta a ni.