Olivia Rodrigo a la ropui zel

Billboard Hot 100, Global 200 leh Global 200 Excl. US chart-ahte Olivia Rodrigo hla hit 'Drivers License' bawk pakhatna a ni leh a, heng chart pathumah hian a zawnin kar thum chhung pakhatna a ni tawh.

'Drivers License' hi  Geffen/Interscope Records kaltlanga January 8-a a tlangzarh kha niin heng chart pathumah hian topper a ni nghal a, kar riat lai a liam hnuah pawh a dinhmun ngai, pakhatnaah a la ding vang a, Disney's High School Musical: The Musical: The Series star Olivia Rodrigo hi US-ah chuan thla hnih chhung tehmeuh an hla ngaihthlak nasat ber a ni tawh a ni.

Billboard Hot 100 chart-a pakhatna  anih leh theihna atan hian kar hmasa chhung khan US-ah chuan vawi maktaduai 19.7 lai stream a ni a, kar hmasa leh aiin 9%-in a tlahniam thung. Download hmangin 9,000 hralh a la ni bawk a,  radio airplay audience impression mtd 73.2 a nei bawk niin MRC data chuan a tarlang.

Hot 100 chart-a 'hla' kar riat leh a aia rei awm thei hi mi pasarih chiah a la awm a, chung zingah chuan Olivia Rodrigo  'Drivers License' hi a inhlangkai ta der mai a ni. Chutiang record siam thei hla nei midangte chu- Mariah Carey, Elton John, Drake, Puff Daddy, Adele tih vek an ni nawk a, American tleirawl hian hla pakhat a rawn tlangzarh dek dek a, record ropui tak a rawn nei nghal der mai a ni.

Billboard 200 chart-ah chuan Morgan Wallen 'Dangerous: The Double Album' chu pakhatna a ni leh a, a zawnin kar riat chhung pakhatna a ni tawh. The Weeknd 'The Highlights' chu 12-na aṭangin pahnihnaah a rawn invawrh thung a, pathumna chu kar hmasaa pathumna tho, Pop Smoke 'Shoot For The Stars Aim For The Moon' bawk kha  a ni leh a ni.