The Weeknd parvul hun chhung a rei
The Weeknd hla 'Blinding Lights' hit zia sawi nawn a ngai lo a, nikum chhunga hla lar ber pawl a ni tih chu rimawi lam tuipuitute chuan an hre awm e. He hla hi Billboard Hot 100 top 10-ah kum khat tehmeuh zu han lang thei a!
Nikum February thla aṭang khan Billboard Hot 100 top 10-ah a inhlangkai ṭan a, tuna chart an tihchhuah hnuhnung ber thleng khan top 10-ah hian a la cham. Top 10-ah a cham satliah mai pawh a ni lo, chart thar berah chuan pathumnaah a rawn invawrh leh a ni.
Kum 2020 April leh May thlaah khan kar li chhung pakhatna a ni a, December thlaah khan 11 leh 18-naah a tlahniam ve zawk thung. Mahse chart top 10-a a cham hun chhung zawng zawng hi kum khat a tling tawh a, top 5-ah kar 43 lai a cham tawh bawk.
Artist 100 chart-ah pawh tunah hian pakhatna a ni mek a, he chart-ah hian Morgan Wallen leh Ariana Grande-te'n an dawt thung.
Billboard Artist 100 top 3
1 The Weeknd
2 Morgan Wallen
3 Ariana Grande