Ṭanpui ngaite ṭanpuitu Metallica

Thla hmasaa thlipuiin a nuai Texas mi, harsatna tawkte ṭanpuina turin heavy metal legend Metallica chuan Feeding America hnenah $75,000 an pe.

Metallica hian an foundation  All Within My Hands kaltlangin sum hi an pe a, thlipui tuar nasa zualte'n ei leh in tur an neih theihna turin sum tam tham tak hi an pe a ni. Thuchhuah an siamah Metallica chuan,"Thla hmasaa Texas nuaitu thlasik thlipui khan state mipuite inrinlawk theih aia nasain chhiatna a thlen a, khua a vawt zual hle a, power a tihchhiat bakah chhungkaw tam takin harsatna nasa tak an tawh phah a ni.

"Grocery chuan an theih tawp chhuah mah se mipui mamawh an phuhru zo lo. Boruak tlemin lum ṭanin electric pawh hmun ṭhenkhatah chuan ṭha leh tawh mah se mi tam tak chuan harsatna nasa tak an la tawk a ni. Chung harsatna hrang hrang kan chhawmdawl ve theihna tur chuan All Within My Hands chuan Texas food bank-a sem turin Feeding America hnenah $75,000 an pe a ni," tiin an tarlang.

Tunkarah pawh hian Central Texas-a cheng mi tam tak chuan tui thianghlim in tur an la nei lo a ni. Metallica hi midangte ṭanpuina kawngah an thawk ṭha ṭhin hle a, nikum September thlaah pawh khan  All Within My Hands kaltlang tho hian California, Washington, leh  Oregon-a ram kang tuarte ṭanpuina turin $250,000 an lo pe tawh bawk.