Royal Photographic Society patron thar Kate Middleton

Queen Elizabeth-i'n kum 67 zet chhung a lo chelh tawh, Royal Photographic Society patron nihna chu Duchess of Cambridge, Kate Middleton hnenah hlan chhawn a ni ta. 

Hemi chungchang hian Kensington Palace chuan Thawhlehni khan thuchhuah an siam a, Queen Elizabeth chuan patron nihna hi Duchess Catherine hnenah a hlan fel ta tih an tarlang. 

Kensington Palace chuan chuan, "Duchess of Cambridge (Kate) hi photography lam tui tak a ni a, hei hian art leh creativity lamah nasa takin hmasawnna a thlen ngei dawn a - a bik takin kum lama naupang zawkte tan a ṭangkai hle dawn a ni," tiin an tarlang. 

Royal Photographic Society hi kum 1853 khan din a ni a, a tum ber chu photography hmanga art leh science tih hmasawn a ni. Duchess-in Royal Photographic Society patron hna a chelh rual hian hmalakna tur a nei nghal dawn a, naupangte tan 'special photography workshop' a buatsaih dawn a ni. 

RPS hian kumin hian anni­versary an lawm dawn a, hemi atan hian project pakhat 'Action for Children' an kalpui mek bawk. He project kaltlang hian naupangte tan hian photography workshop hi an buatsaih dawn a ni. 

Duchess of Cambridge, Kate Middleton hi kum 2017 khan Royal Photographic Society-ah hian Honorary Member a ni a, tunah chuan patron nihna pek a ni ta a ni. Thlalak lamah a tui hle a, Prince William, Duke of Cambridge nena an fa - Prince George (5), Princess Charlotte (4) leh thla 14 mi Prince Louis-te chu thla a laksak zing hle a ni. A kutchhuak hi a professional viau a ni awm a, official thlalak atan eng emaw zat an ring nghe nghe a ni.