Star Wars: Episode IX - The Rise of Skywalker khum thei an la awm lo

Box Office-ah Star Wars: Episode IX - The Rise of Sky­walker bawkin sum a lalut hnem leh ber a, Jumanji: The Next Level chu sum lalut tam ber dawttu niin Little Women chu pathumna a ni ve bawk.

Star Wars: Episode IX - The Rise of Skywalker chuan Box Office-ah a zawnin ro a rel ta a, kar tawpah khan US-a theatre 4,406-ah tihchhuah niin $34,524,815 zet a la lalut thei a ni. December 16 khan premiere a nih hnuah December 20 khan US-ah tlangzarh a ni a, a hit nghal hle.  

Film siamna atana an budget pawh hi a tam tham hle a, $mtd 275 zet niin, khawvel puma Box Office aṭanga a sum lakluh tawh zat chu $mtd 919.6 zet a ni tawh bawk a, kumtawp an khar ṭhat bakah kumbul pawh an ṭan ṭha leh hle a ni. Star Wars sequel ho reng reng hi a hlawhtling em em zel a, Rise of Skywalker heti taka a hlawhtling leh pawh hi thil mak a ni hran lo. 

Jumanji: The Next Level pawhin kar hmasaa a dinhmun a la humhim thei a, kar eng emaw zah a liam hnuah $26,227,346 zet a la lalut phak. Jumanji hi a en tawhin hmuhnawm an ti tlangpui a, a sum hmuhchhuah pawhin hniam lam a pan thei tak tak lo. Khawvel puma a sum lakluh pawh $mtd 610.2 lai a ni tawh.

Kar hmasa khan palina ni mah se, Frozen II khumin Little Women chu pathumnaah a rawn inhlangkai leh a ni. Frozen II pawh nikum Novem­ber 22-a tlangzarh daih tawh kha ni mah se a sum lakluh a la tam hle a, khawvel pumah a sum lakluh tawh zat chu $tld 1.326 zet a ni tawh. A hmuhnawm titu an la tam reng a, Box Office-ah pawh palina a la ni phak. Tunlai horror film lar em em The Grudge chu pangana a ni ve bawk a, theatre 2,642 aṭangin $11,404,113 a lalut a ni.