Katy Perry leh Orlando Bloom Kuminah innei dawn

29th June, 2019

American singer Katy Perry leh English actor Orlando Bloom-te chu kumin chhungin an inkutsuih ve tak tak dawn ta tih khawthlang media-te chuan an tarlang. Kumin Frebuary thla khan an lo inhual tawh a, inneih zai an rel ve dawn ta a ni - a hun leh ni tur lam erawh tarlan a la ni lo thung.

Entertainment Tonight chuan Katy Perry leh Bloom-te hian inneih ceremony buatsaih turin a ṭul ṭul an buaipui a, hun awl pawh an nei meuh lo tih an tarlang. An ṭhian hnai leh chhung khatte sawma hun hlimawm tak buatsaih an tum a, an ruahmanna zawng zawng erawh an la puangzar rih lo tih an sawi bawk.

Media ṭhenkhat chuan Katy Perry nena inhmelma Taylor Swift pawh sawm bik zingah a tel tih an sawi. Swift nen hian hun rei tak chhung an lo in 'ui leh ar' hnuah tunhnai khan an inkar a ṭha leh tawh tih lantirin cake-te pawh an lo zaidun tawh a, sawm zingah a tel a nih pawhin a mak lo ang.

Perry leh Bloom-te hi 2016 aṭang khan an inzui ṭan a, kumin Valentine's Day khan an inhual a ni. An inhual thu hi a tirah an puang nghal mai lo a, Katy Parry-i'n socia media lama an inhual thu a tarlan hnuah a darh ta chauh a ni.

Kum 42 mi 'Pirates of the Caribbean' star Bloom leh 'Dark Horse' singer Perry (34)-te hian inṭhen chang nei ve bawk ṭhin bawk mah se, changdang kan erawh an tum hauh lo. 'Tiam tlat e' tidun tura kawng hmasa an zawh dun hnuah, chhungkaw din turin thutlukna an siam fel ta a ni.

Katy Perry & Orlando Bloom

• January 2016 khan a vawi khat nan Golden Globe Award-ah an intawng

• April 2016 khan Met Gala-ah hmuh dun leh an ni

• August 2016-ah chawlh an hmang dun a, a hnu lawkah an inṭhen

• March 2017-ah an inṭhen thu an puang a, thla kaw liam hnuah an inkawp leh

• February 2018-ah an inṭhen leh a, a hnu lawkah an inzui hmuhdun leh an ni!

• February 2019-ah an inhual thu an puang

• Orlando hian nupui hmasa a lo nei tawh a, 2010 khan Australian model Miranda Kerr nen inneiin fapa pakhat an nei.

• Katy Perry hi English comedian Russell Brand nen 2010 - 2011 chhung khan an lo innei ve zawk tawh bawk.