‘Song-Song’ couple inṭhen hnai

South Korean film star lar Song Joong-ki leh Song Hye-kyo-te chu kum hnih pawh an inneih tlin hmain an inṭhen hnai tih media-te chuan an tarlang. An inṭhen chhan tur lam tarlan a ni lo a, amaherawhchu, dan leh thupek hnuiah fel thlapa inṭha ṭhen an duh tih an sawi. 

South Korean super­star Hye-kyo leh Joong-ki-te hi an hming bulah 'Song' tih a awm ve ve a, fan-te pawhin ‘Song-Song’ couple tiin an sawi ṭhin. Amaherawhchu, an inkar boruak a chhe chho a, inṭhen hial an lo titlu ta a ni. Hemi chungchangah hian kum 34 mi Joong-ki chuan, "Chanchin hriat nuam lo tak a ni ang tih ka ring a, in rilru pawh a tina ngei ang - inmi hriatthiamna ka dil e," tiin a sawi. 

Full House star Hye-kyo leh Joong-ki te hi South Korean television serial 'Descendants of the Sun'-ah an changdun a, heta ṭanga intawng hi an ni. October 2017 khan an innei a, an inneih thu hian film industry pawh a dengchhuak hneh hle a nih kha. Amaherawhchu, kum hnih em pawh innei hman loin inṭhen turin thutlukna an siam fel tawh a, nupa inṭhen tam tak anga an buai zui ve loh nan dan lamah chinfel ngai an chingfel hmasa a ni.   

Song Joong-ki dan hre mite chuan, "Joong-ki leh Hye-kyo-te hian inhriatthiam tawnnaa inṭhen fel an duh a, mualpho taka inpuh chhiat tawn an tum lo. Dan hre mite an rawn a, an thutlukna puanchhuah a ni thuai dawn e," tiin an tarlang bawk. Hye-kyo leh Joong-ki te hi South Korea-ah chuan an lar vet vet hle a, Asia leh khawmualpui dang thlenga hriat hlawh tak an ni.