'Drivers License' singer-in Driving license neih a harsat!

American tleirawl zaithiam, a hla hit 'Drivers License' vanga rimawi khawvelin a ngaihzawn rawn mek Olivia Rodrigo chuan driving license neih a harsat hle tih an interview-naah a sawi chhuak mauh mai.

Kum 18 mi, High School Musical: The Musical: The Series star Olivia Rodrigo chuan vawi li lai a beihnawn hnuah a driving license a hmu chauh tih a sawi. A driving exam hmasa pahnih chu cancel a ngaih thu sawiin, a hmasa ber chu Covid-19 vanga a cancel hnuah HSM chan a ngaih avangin a vawi hnihna chu a ṭhulh leh a ni. 

A vawi thumnaah erawh a tum urhsun hle a, driving exam nei tur ngawr ngawrin Utah aṭangin LA pan mah se a test-na tur a nu car horn chu a hman theih loh avangin test chu an nei leh thei lo a, a vawi linaah erawh tluang takin a exam thei ta tih a sawi.

Olivia Rodrigo hian a debut single 'Drivers License' chu January 8 khan a tlangzarh a, rimawi khawvelah a hit nghal rem rem hle a, Billboard Hot 100, Billboard Global 200 leh Billboard Global 200 Excl. US chart-ahte a zawnin kar riat chhung pakhatna a nihpui tawh a ni.