Grammy-ah John Mayer leh Maren Morris an perform dun dawn

Kum 2019-ah khan SiriusXM-in an interview-naah American singer Maren Morris chuan zaithiam a thawhpui chak an zawhna chhangin Post Malone, John Mayer leh Ed Sheeran-te hming a sawi ri a, chung a thawhpui chak zinga mi John Mayer nen chuan tun Pathiannia zana an sem tur Grammy Award ceremony-ah an perform dun dawn.

John Mayer leh Maren Morris-te hian eng hla nge an sak dun dawn an la tarlang lo a, mahse Morris hian a Instagram story lamah an zai dun dawn tih hi a tarlang a; an pahnih backstage-a hmai tuama an thlalak dunna a post a ni. 

"Grammy-ah kan inhmu dawn nia," tih ziak lang telin John Mayer a tag nghe nghe. Rehearsal an nei dun lai thlalak pawh social media-a post ṭhenkhatah hmuh tur a awm bawk.

Maren Morris hi Best Country Song category nominee a ni a, kuminah hian Grammy award a dawng a nih chuan a Grammy pahnih dawnna tur a ni dawn a ni. John Mayer erawh hi chuan Grammy award pasarih lai a dawng tawh thung.

Bruno Mars leh Anderson .Paak-te pawhin tunhnai lawka an single tihchhuah thar dangdai tak 'Leave the Door Open' kha an perform dawn a nih hmel a, hei pawh hi Bruno Mars fan-te chuan an nghakhlel tawh hle ang tih a rinawm.

Recording Academy lam chuan kum dang ang lo takin Pathianni liam ta khan kumin Grammy-a perform tur list an tarlang rual vek a, kumdangah chuan a tahtawl te tein an tarlang ṭhin thung. Bad Bunny, Black Pumas, Cardi B, BTS, Brandi Carlile, DaBaby, Doja Cat, Billie Eilish, Mickey Guyton, Haim, Brittany Howard, Miranda Lambert, Lil Baby, Dua Lipa, Chris Martin, John Mayer, Megan Thee Stallion, Maren Morris, Post Malone, Roddy Ricch, Harry Styles, leh Taylor Swift-te chu perform tur an ni.