Box Office-ah Film khawvel thununtu Avengers: Endgame

Fantasy/Sci-fi movie 'Aven­gers: Endgame' chuan film khaw­vel a thunun mek a, a thlen chin apiangah roreltu a ni! Ram hrang hrangah 'ber' nihna a hauh vel vek a, World Box Office-ah history a siam hial. 

American film director lar Anthony Russo leh Joe Russo-te kutchhuak film hian tun weekend chhung khan $tld 1.2 zet a lalut a, film chhuak tawh zawng zawng zinga hetiang zat sum lalut thei rang ber a ni. US dollar tluklehdingawn khat lalut tling tur hian ni ngah bak a mamawh lo a, pui rem rem tak a ni. 

North America bikah chuan $mtd 357 zet lalutin Box Office-ah roreltu a ni a, amah hnaih bertu Captain Marvel chuan $mtd 8.3 a lalut. An sum lakluh zat hi a inthlau rem rem hle a, Avengers lakluh zat hi top 10-a lang te sum lakluh belhkhawm ai pawhin a tam zawk a ni!

Ram 18-ah 

Avengers: Endgame hi April 26 khan India-ah tlangzarh a ni a, khawvel ram hrang hrangah tihchhuah a ni bawk. Hriat theih chinah ram 18 zetah roreltu a ni mek a, US leh China-ah phei chuan Box Office a thunun hneh hle. UK, Korea, Mexico, Australia, Germany, India, Brazil, France, Italy, Philippines, Thailand, Indonesia, Spain, Japan, Hong Kong leh Taiwan-ahte ber nihna a hauh vek bawk. 

US chu ram mala sum a lak­luh tamna ber niin, $mtd 350 chuang zet a thawk chhuak. Khawvela mihring tam berna China aṭangin $mtd 330.5 a lalut a, UK ($mtd 53.8), Korea ($mtd 47.4), Mexico ($mtd 33.1) leh Australia ($mtd 30.8) te chu sum leng vak tamna a ni bawk. 

Germany, India, Brazil leh France aṭangin $mtd 20 chuang vek a hailut bawk a, a sum lakluh tlemna ber Taiwan aṭang pawhin $mtd 12.3 zet a thawk chhuak a ni. India bikah chuan tlangzarh nia sum lakluh tam lamah Baahubali 2: The Conclusion chiah tluk loh a nei. 

Nikum April thla khan Infini­ty War a chhuak a, kumin April thla-ah Endgame a chhuak ve leh bawk. Avengers : Infinity War khan tlangzarh karah $mtd 641 lalutin record a lo siam tawh a, hei hi Endgame hian a rawn khum. Marvel Studios superhero film 22-na Endgame hian tlangzarh karah $tld 1.2 zet a lalut a, a khum chiang hle a ni.

-    Preview-a sum lalut hnem ber ($mtd 60)

-    Release niin theater 4,662-ah chhuah a ni

-    Tlangzarh nia sum lalut hnem ber ($mtd 156.7)

-    Tun weekend chung khan film aṭanga sum lut zawng zawng 90% a hui

-    Chawhruala theatre tin aṭanga sum lalut hnem ber ($75,075)

-    $mtd 100 lalut rang ber

-    Weekend vawi khata $tld 1 lalut tling hmasa ber