Francis-a'n hla thar a tichhuak dawn "Ka thi, ka dam lo"

'Thinlung khaw­ngaihthlak' tih hla thiam tak maia satu, Francis-a chuan zanin hian hla thar 'Ka thi, ka dam lo' a tichhuak dawn.

A hla tihchhuah hmasak 'Thinlung khawngaihthlak' kha Ramenga (Triau Trackx) phuah niin, mi maktaduai 2.3 chuangin YouTube-ah an thlir tawh a, 'Ka thi, ka dam lo' pawh hi a phuah leh tho a ni a, a nalhin a hit leh hle dawn tih a chiang.

"He hla hi lengzem hla mittui nena ka phuah awm chhun ve ania, nikum February a Cassettes 'Engtinnge ni dawn' kan record laia Kings and Prophets studio a ka phuah a ni a. Tin, hlathu a 'Lungleng' tih ṭawngkam ka hman ve vawi khatna a ni bawk," tiin Ramenga chuan he hla a phuah chungchang hi Vanglaini a hrilh.

A sawi ang ngei hian a hla hi a lungrun hle a, Francis-a aw nena inhmeh tak hla a ni leh bawk. Di tel loa awm hrehawm zia leh lunglenthlak zia, dam reng chunga thi ang mai a nih theih zia tarlanna hla a ni. "Lusun lo hian, hmangaih ka sun" tia Francis-a a zai vawng vawng i ngaithla duh a nih chuan zanin dar 6 hian a produce-tu YouTube channel Zosiam lo chan tawp mai a chi ang. YouTube-ah hian a lyrics video dahchhuah phawt a ni dawn a, Spotify-ah pawh dah a ni dawn bawk.

A music hi Mizorama musician ṭha ber berte zinga mite kutchhuak a ni. Jonah Ralte (Shai Hills/Freddys Nightmare), Bruce Pachuau (The Breeze /Shai Hills/Origami/Mizo Idol) leh Mamawia Colney(The prophets)-te kutchhuak a ni a, a mawi dawn tih a chiang.

Recording hi a hla ngei a phuahna hmun, Kings and Prophets Recording Studio-ah an ti bawk a ni.