NORAH, i zûnzám a ni

Lunglei khawpuiah chhuah a ni tawh a, tualchhung film chhuak thar NORAH chu May 1, Thawhlehni zan khan Aizawlah pawh chhuah a ni ve ta - Zawlkhawpui ṭhalaite'n an hlut nghal rem rem hle!

Thingtlang Tlang­val hmuhnawm zia kan la sawi bang lo a, NORAH pawh Mapuia Chawngthu kaihhruaina hnuaia buatsaih a nih avangin mipui lamin beisei an nei sang. Zan dar 7:00 a chhuah ṭan tur ni mah se, thim hlim aṭangin Vanapa Hall gate-ah luh tum mipui an inhawrkhawm mup mup tawh.

Home minister fanu neih chhun Norah-i'n hmangaihna a laknat dan, thianghlim leh huaisen taka hma­ngaih­tu dik a hmuh chhuahna film hi darkar hnih chhung hret a ni a, a kar lakah boruak chawk zângkhâi thei tur 'funny' lai a awm leh zauh ṭhin avangin a ninawm hman loh.

Mizo tlangval rin­awm J-a nun aṭangin ṭhalaite'n zirtur an nei dawn a, tualchhung politics boruak rawn inzep zauh chu puitling lam pawhin hmuhnawm an tih zualna chhan tur pakhat a ni. Aizawla chhuah zana entu tleirawl pakhat chuan, "A chángin pum na vek khawpin ka nuih a za a, a tawpah erawh hmangaihna lungrun lutuk avang khan ka mittui a luang leh tho si," tiin Norah film a en chungchang Vanglaini a hrilh.

NORAH film hi Mizoram hmun hrang hrangah chhuah a ni leh dawn a, mipa dik tak J-a leh Norah-i duhawmna zûnzam chuan Mizo ṭhalaite hneh taka min tuam vel a nih pawhin a mak lo ang.