Khawvelah mihring aiin mobile phone a tam zawk!

United Nations hnuaia Inter­national Telecom­munica­tions Union (ITU) chuan khaw­vela mihring cheng zawng zawng aiin, mobile phone a tam tawh zawk tih a tarlang. ITU report hi kum 2018 behchhana siam niin, mihring 100 zelin mobile phone 107 hmang anga chhut a ni. 

Nikum kum tawp thleng khan khawvel mihring tluklehdingawn 3.9 zet chuan internet an hmang a, hei hi mihring awm zat aṭanga 51.2% a ni. Chung zinga a tam zawk chuan mobile phone aṭangin internet an hmang a ni. Ram changkang kan tih zingah mihring awm zat aṭanga chhutin internet hmang an tam hle a, mi maktaduai 753 vel zet an tling. Developing country-a cheng mi maktaduai 1,028 chuangin internet an hmang bawk a, mihring cheng zat aṭanga chhut erawh chuan a hniam zawk a ni. Developed country zingah mi mala internet hmang pha an tam zawk bawk.  

Khawvela mihring awm zat hi tld 7.6 vel a nih laiin, mobile phone awm zat chu tld 8.9 vel anga chhut a ni. Hetih lai hian mihring hmun thuma ṭhena hmun hnih vel chauhin mobile phone an hmang a, hei hi 66.72%  chauh a ni. 

Ram hrang hrang zingah China, India leh US-te chu mobile phone hmang tamna an ni a, percentage-a chhut chuan United Arab Emirates an sang ber thung. UAE-ah hian 82.20% zetin an hman laiin, China leh India-ah chuan - 55.60% leh 28.50% chauhin mobile phone an la hmang phak a ni.