Billboard Music Award-ah 'King of BBMA' Darke-a'n Taylor Swift record a khum
Music khawvela award ngaihlut berte zinga mi, Billboard Music Award (BBMA) chu nimin zing khan Grand Garden Arena, Las Vegas-ah sem a ni leh ta a, Canadian singer Drake chuan record duhawm tak a siam.
'Scorpion' singer hian award 12 zet a hui a, Billboard Music Award history-a chawimawina dawng hnem ber a ni nghal bawk. Drake hian Taylor Swift record (23) chu a khum a, BBMA 27 zet a kawl ta a ni.
King of BBMA chu...
Billboard Music Award hi kum 1990 aṭangin sem ṭan a ni a, kumina sem a nih hma khan Taylor Swift leh Beyoncé-te chu award dawng hnem ber an ni a, 23 ve ve an kawl. A ṭum 29 nan sem a nih leh tak hnuah erawh thil a danglam ta a, Darke chuan 'ber' nihna a rawn hauh ta a ni.
Canadian singer ropui hi 'King of Billboard Music Award' tih loh rual a ni lo a, a ropui zia hahipin an sawi. Kum 32 mi hian tun ṭumah hian award ngaihhlut tak tak a hui a, chung zingah chuan -Top Artist, Top Rap Artist leh Top Rap Album-te a tel. Heng bakah hian - Top Billboard 200 Album, Top Hot 100 Artist, Top Radio Songs Artist, Top Rap Male Artist leh Top Song Sales Artist-te a dawng a, Top Billboard 200 Artist, Top Streaming Songs Artist leh Top Male Artist-te a la hui cheu bawk.
DRAKE
Top Artist
Top Rap Artist
Top Rap Album
Top Billboard 200 Album
Top Hot 100 Artist
Top Radio Songs Artist
Top Rap Male Artist
Top Song Sales Artist
Top Billboard 200 Artist
Top Streaming Songs Artist
Top Male Artist
Cardi B = 6
Rapper lansarhna Billboard Music Award-ah Cardi B chuan award paruk a humhaw a, mimala langsar ber pakhat a ni. American rapper hi category 21 zetah award dawng thei tura chhawpphuah a ni a, chung zinga paruk-ah chuan winner a ni.
Cardi B hian award ngaihhlut tak pakhat Top Rap Female Artist a dawng a, mi bik a nih zia a pholang leh ta a ni. Maroon 5 nen thawkdunin hlawhtlinna tam tak an lo chang tawh a, tun ṭumah pawh award pali zet an dawng leh. An hla hit 'Girls Like You' hmangin - Top Selling Song, Top Radio Song, Top Collaboration leh Top Hot 100 Song-te an hui a ni. Hei bakah hian Bad Bunny leh J Balvin-te nena an sak 'I Like It' chu Top Rap Song atan thlan a ni bawk.
CARDI B
Top Selling Song
Top Radio Song
Top Collaboration
Top Hot 100 Song
Top Rap Song
Record break kum!
Kuminah hian record thar 12 zet a awm a, Billboard Music Award sem tawh china kum chhinchhiah tlak berte zinga mi a ni. Ariana Grande chuan a vawi khat nan Top Artist award a la a, Billboard Chart Achievement Award hlan a ni bawk.
BTS chuan K-pop zinga a hmasa ber ni turin Top Duo/Group award an la a, kum zawna a vawi thum nan Top Social Artist atan thlan an ni leh bawk. American rapper Juice WRLD chu Top New Artist atan thlan niin, Florida Georgia Line chuan Top Country Song category-ah a zawna vawi thum award lain record an siam bawk.
Imagine Dragons-te chuan a ṭum thum nan leh a zawna a kum hnih nan Top Rock Artist award an la a, Ella Mai chuan a vawi khat nan award pathum a dawng bawk. The Chainsmokers chuan record thar duhawm tak siamin, a ṭum ṭhum nan Top Dance/Electronic Artist award an la a, Top Dance/Electronic Album an hui tel bawk.
Gospel singer ropui Lauren Daigle chu hmeichhe singer zinga Top Christian Artist ṭum hnih ni thei hmasa ber a ni bawk a, 2017 khan he chawimawina hi a lo dawng tawh bawk a ni. Lauren hi gospel singer zinga langsar ber niin, Top Christian Album leh Top Christian Song award-te a hlawh chhuak a ni.
Tute nge perform?
Billboard Music Award-ah hian tun hnaia music video tichhuak, Taylor Swift leh Brendon Urie-te chu mipui lawm hlawh ber tih ngam an ni a, an perform a pui rem rem hle. Swift leh Brendon-te hian an hla thar 'Me' an perform a, an music video a mi ang deuhin nihliap nen stage-ah a chetla vel a, entu mipui thawm a ring ṭha hle.
Korean boy band BTS leh Halsey-ten mipui an chawk hlim hle bawk a, Maluma leh Madonna-te chu mipui mitfukna ber pakhat an ni bawk. Ṭum dang ang bawkin Jonas Brothers-ten lawm an hlawh leh pek hle a, ṭawiawmtu pawh an nei ṭha hle.
Ariana Grande chuan a hla hit '7 Rings' a perform a, Khalid a inlar bawk. Tori Kelly leh Dan + Shay ten 'Speechless' an perform a, Mariah Carey a che ṭha viau bawk. Host Kelly Clarkson chuan Medley mawi tak hmangin show hi a khuhhawng a, ani hian a ṭum hnih nan Billboard Music Award hi a host a ni.