Malsawmdawngkimi Music video thar 'A lo kal thuai dawn'

Mizo Idol star Malsawmdawngkimi (KimDong-i) chuan a music video pahnihna tur 'A lo kal thuai dawn' tih chu a peihfel ta a, zanin hian Zonet-ah tihchhuah a ni ang. 

Mizo Idol 2018-a top 6, KimDong-i hian nikum December thla khan a music video hmasa ber 'A hnen pan la' chu a lo tichhuak tawh a, he hla hi Idol intihsiak lai pawha a lo sak tawh ṭhin kha a ni. Ṭhazual chart-ah pawh hun rei tak chhung a lo lang tawh a, a boruak daih hmain hla thar a rawn nei leh ta a ni. 

A music video thar, ‘A lo kal thuai dawn’ tih hla hi B. Puia Zaiawi leh PL Engmawia-te phuah niin, audio leh video hi Aichhung Records & Visual kutchhuak a ni. Make up artist hi Kymz Ralte niin, Achhani Innovative dresses-ten an thuam thung a, a video hian belhchian a dawl hle a ni. 

Kolasib nula Malsawmdawngkimi music video hi Music Domain Mizoram (MDM) library-ah dahluh niin, Zonet leh MDM YouTube-ahte en theih a ni ang.